Nongstoiñ, Jylliew 11: U bah Klestar Syiem na ka shnong Khliehmawlieh West Khasi Hills, u dei u nongrep u ba trei shitom bha ban wad jingtip bad pan jingmut na ki stad wad bniah halor ka rep ka riang kumno ban rep bad ban wad bniah ïa ki jait jingthung kiba long ba thung katkum ki jaka bad ka jinglong ka suiñ bneng.
U bah Syiem haba ïakren bad u nongthoh khubor, u la ong ba ha kaba sdang u la pyrshang ban rep da u soh strawberry, soh grape, ki jhur ba bun jait, soh plom, bad kiwei kiwei bad kat nang mih ki snem, u la pyrshang ban rep bad thung sa ïa kiwei kiwei ki jait jingthung kum u tit, soh dragon bad mynta u snem u la sdang ban thung sa ïa uwei u jait tit u ba la ju tip kum u tit Japan.
U la ong ruh ba na pdeng ki jait jingthung baroh u tit Japan u dei u ba suk tam ban thung bad uba ïaid ïew bha. Haba kylli ha kador katno ki die ïa utei u tit Japan, u la ong ba ki don ki por ba ka dor ka poi tang sawspah tyngka shi kilo bad lada ka dei ka por ba ka ïew ka hat ka biang lei lei lah ban die haduh phra spah shi kilo.
U bah Syiem u la ong ruh ba ha kine ki sngi da ki hajar ki samla kiba la nang la stad, ki ud ki nam ba kim don kam don jam bad ki khmih lynti tang kumno ban ïoh kam sorkar. Hynrei haduh mynta ym don ba shimkhia ha ka kam rep.
Nalor kata u la ong ba bun ruh kim ñiew ba ka rep ka riang dei ka kam namar ba ki hap ban trei da ka bor met nalor kata ki hap ban pynlut pynsep ha kiba bun ki liang.
U la bynrap ruh da kaba ong ba lada ki samla kiba la nang la stad ki kwah ban pahuh pahai ban lait na ka jingkyrduh, ka rep ka riang ka dei ka lad ban pyllait na kitei ki jingeh.
Hynrei ka jingtrei shitom bad ka jingminot ban wad jingtip na ki riew shemphang bad ki stad wad bniah jong ka rep ka riang ryngkat ka jingleit shah pyntbit ka long kaba donkam haduh katta katta.
