Mawkyrwat, Nohprah 17: Ka Kynhun ki nongñiah ar shaka kaba la tip kum ka The Ultimate Legend Bikers Association (TULBA) kaba ju phaikhmat ban ïarap ïa ki briew kiba duna ka ïoh ka kot khamtam eh ïa ki longïing baduk bad kiba shem shem shitom ha ka sngi Saitjaiñ ka la plie paidbah ïa ka ïing ba la pynshna mon sngewbha ha ka shnong Wah Mawpat, Raid Saw Symper, East Khasi Hills District.
Ka jingthmu jong ka TULBA ban leh ïa kine ki kam isynei ka long ban pynsngewthuh ha ki briew ba kumba kiwei ki ïoh ka lad ban leh kmen Khristams, kumta ruh kane ka kynhun ka pynrung ha ki dkhot ba ki dei ban leh eiei ha kum kane ka aïom na ka bynta ki longïing baduk basuk. Kane ka jingleh jong ka TULBA ruh kam dei ba ka ïoh jingïarap nangno nangno hynrei da ka noh synñiang manla u snem na ki para dkhot.
Ïa ka ing ba ka TULBA ka la pynshna thymmai la aiti sha ka Kong Larita Nongbet.
Shwa kane, ki dkhot ka TULBA ki la pynlong ïa ka jingïaid Christmas Carol da ki thuk thuk kaba la sdang na phyllaw jong ka State Central Library, Shillong bad pynkut ha ka shnong Wah Mawpat.
Ha ka jingïalang ba lyngkot, la ïoh jingkren na u President ka TULBA Central Body u Bah Rishanskhem Nongrum, ka jingduwai na u Bah Wankit Nongkynrih bad ki jingkren na kiwei de ki dkhot jong ka TULBA Central Body bad ka jingduwai pynkyntang ïa ka ïing na u Pastor Ïaidbiang Marweiñ.
Hadien kane, la ot ïa u ribon jong ka ïing ba thymmai da ka kong Larita Nongbet.
