Jowai, Nohprah, 19: Ki nongshong shnong jong ka thaiñ Namdong A bad B ha ka sngi Palei ki la rai ban ai jingkyrshan kaba pura ïa u Bah Damian S War uba dei u President ka FKJGP-West Jaiñtia Hills bad ha kajuh ka por uba long ruh u Waheh Shnong jong ka shnong Namdong ‘B’ ba un aireng ha ka elekshon MDC sha ka JHADC.
Ha kane ka sngi la ïadon lang ruh u MDC ka thaiñ, u Bah Dawan Lyngdoh, u bah Lambor Lyngdoh Waheh Raij Namdong, Isidol Pakma Secretary Raij Namdong, Ma Arki Sumer Waheh Shnong ka Namdong A, Asst. Waheh Shnong Namdong B, ki Dkhot Shnong na baroh arliang ki Dorbar Shnong, ki Nongialam Shnong na ki Shnong kiba marjan naduh Waheh Shnong ka Lumrot Nobel Ryngkhlem, Ma Chalbi Siangshai Asst Waheh Shnong Madanratiang ryngkat bad ki paidbah ka thaiñ kiba la mih ryntih ban ïa rai lang ïa kane ka kam iakhun MDC na ka 10-Mynsngat Khanduli constituency.
U MDC ba mynta u Dawan Lyngdoh haba ai jingkren ula ai khublei ïa ki paidbah nong kyrshan kiba la pynjop donburom ïa u ha ka elekshon kaba ladep bad u la ong ba wat lada um iakhun shuh ha kane ka elekshon ka ban wan, hynrei un ai ka jingiatrei lang bad ki paidbah ka thaiñ bad ruh ula ong ba ki paidbah ki dei ban jied ïa u briew uba don ka jingmut kaba skhem bad ruh uba don ka jingkitkhlieh ban bah ïa ka lyngkor kum u nongialam.
U la kyrpad ruh ïa ki paidbah ban ai ka jingkyrshan kaba pura ïa u bah Damian S War ba un bteng ïa kane ka kam na ka thaiñ bad ban leit mihkhmat shapoh ka JHADC.
U Bah DS War haba ai jingkren u la ong ba ka por ka la biang ïa u ban shim ïa kane ka sienjam ban iakhun ïa kane ka elekshon sha JHADC bad u la ong ruh ba lada un poi sha ka thong un peit lang salonsar khamtam ban pynneh pynsah ia ka khyndew ka shyiap bad ruh ban ïada ïa ki jaka puta khamtam ha ki thaiñ khappud.
