Da u Chandrayan-3 pynieng ka Ram Mandir Durga Puja Committee shi bynta na ka leh niam puja ha Nongpoh

Nongpoh, Risaw 19: Ka Nongpoh Ram Mandir Durga Puja Celebration Committee mynta ka snem ka la rakhe ïa ka jinglehniam puja ha ka rukom kaba kham pher bad kaba kham phuh kham phieng da kaba ka la pynieng da ka dur jong u Chandrayan-3 hakhmat ka Mardir ryngkat ki khubor ai mynsiem sha ki khun samla ka Ri Bhoi District.
Kum ban pynpaw, ka Ram Mandir ha Nongpoh ka la sdang ban rakhe ïa ka jinglehniam puja naduh u snem 1944 bad la tei ïa katei ka Mandir naduh u snem 1927 bad mynta ka snem ka la dei ka jingrakhe ïa kaba 80 snem ïa ka jinglehniam Puja bad mynta ka snem ka Puja Committee ka la pynieng syndon da ka dur jong u Chandrayan-3 kaba don ka jingmut bad ka khubor ban ai mynsiem sha ki khun samla ka District bad ka jylla hi baroh kawei.
Na ka liang ka Puja Committee ka la sdang ban rakhe ïa kane ka jinglehniam Puja da kaba pynphuh pynphieng da ki rong ki rup bad ki jingpynriam bapher bapher lyngba ka Puja Pandal, hynrei kaba kham pher ka dei ka jingsakhi ki paidbah ïa ka jingpynieng ïa ka dur jong u Chandrayan-19 kaba don kata ka khubor ba ki jingmut.
Haba ïa kren bad ki Nongthoh Khubor, u President ka Nongpoh Ram Mandir Puja Celebration Committee, u Unteshwar singh, u la ong ba ka daw kaba la pynlong ïa ka Puja Committee ban pynieng ïa ka dur u Chandrayan-3, ka dei khubor kaba kit jingmut bad ka don ruh ka khubor ba kum ka Committee ka angnud ban pynshlur ïa ki khun samla ka dong Ri Bhoi ba kin phai khmat sha ka juk saian, namar kumba long haduh kine ki sngi la sakhi ba kiba bun ki samla ki pule tang ïa ka Arts bad Commerce stream, hynrei duna bha kiba pule ïa ka Science stream kaba dei kawei na ka subject ba ki samla ki ioh jingmyntoi lada ki poi sha kita ki kyrdan kiba shalor kiba dei katkum ka juk stad ba mynta.
U la ong ruh ka long ka burom ba lada ki samla na Ri Bhoi ki poi sha ki kyrdan kiba shalor ha kaba ïa dei bad ka juk jong ki kor ki bor kiba dei katkum ka jingstad saïan ba mynta ha kaba jan baroh ngi shaniah ha kata ka jingstad saïan bad dei namar kane ka daw ka Committee ka pynieng ïa ka dur jong u Chandrayan-3 kaba long kum ka jingpynshlur ïa ki khun samla ba ki dei ban phai khmat ruh sha ka jingstad saïan khnang ba kan long ka nam bad ka burom ïa ka dong bad ka thaiñ jongngi hapoh ka jylla.
Nalor ka jingpynieng ïa ka dur jong u Chandrayan-3 shi bynta na ka jingrakhe ïa ka lehniam puja ha Nongpoh ban ai mynsiem ïa ki khun samla ban pule sha ki kyrdan kiba shaneng ha ka tnad science, u Singh u la ong ruh ba ka Committee ka phah ïa ka khubor jong ka jingai khublei sha baroh ki paid nongshong shnong ka Ri Bhoi bad ka jylla ba ngin dang pynneh ïa ka shongsuk shongsain khlem da don ka jingïaher jaid ne ha ki niam bad ka thong kaba hakhmat ka long ban kyntiew ïa ka bha ka miat bad ka roi ka par jong ki paidbah ha ka District bad ka jylla hi baroh kawei, u la bynrap.