Shillong, Nohprah 19 : Ka kynhun synrop jongka UDP bad HSPDP ka Regional Democratic Alliance (RDA) ka la pynbna ïa ka kyrteng u Nongïalam barim ka seng HYC u bah Robertjune Kharjahrin ban long kum u kyrtong ka kynhun sha ka elekshon MP-Lok Sabha ka ban long ha u snem ban wan na Shillong Parliamentary constituency.
Ia kane la pynbna da u Chairman ka RDA bad President ka UDP Bah Metbah Lyngdoh mynta ka sngi Ba-ar.
La ïathuh ba u bah Robertjune Kharjahrin un ïakhun ïa kane ka elekshon ha ka shap jong ka United Democratic Party (UDP) kaba dei ka Bom.
Lah ban kdew hangne ba u MLA barim ka Mawlai Bah PT Sawkmie ruh ula pan ïa ka ticket jong ka UDP ban ïakhun ha kane ka elekshon MP-Lok Sabha ban wan.
Kat haduh mynta ka sngi, kiba la pynbna kyrtong ki dei ka NPP , VPP bad ka kynhun RDA hynrei u President ka Congress bad MP ba mynta u Ma Vincent H Pala u ban mih ïakhun biang na ka Congress na kane ka Shillong Parliamentary Constituency.
Ka NPP kala pynbna ia ka Myntri Sorkar kong Ampareen Lyngdoh ban long ka kyrtong ha kane ka elekshon, ka Congress wat la kam pat pynbna hynrei la thikna ban ïakhun hi da u ma Pala, ka VPP da u Dr Ricky Syngkon bad ka RDA da u bah Robertjune.
