Shillong, Jylliew 30 : Ka National People’s Party (NPP) ha ka sngi Nyngkong ka la jied bad pynkshem ïa u Bah Manroibha Kharpuri kum u President ba thymmai ban peit ïa ka Shillong City.
Ïa u Bah Manroi la pynkshem da u Working President ka Party, Bah Hamletson Dohling ryngkat ka jingdonlang u General Secretary ka party Bah Don War, Bah Jason S Mawlong Secretary nalor kiwei kiwei ki nongïalam.
Kiwei pat ki nongkitkam ki kynthup ïa u Bah Lanangshngaiñ Pamthied kum u General Secretary nalor kiwei kiwei ki nongkitkam.
Na ka liang u Bah Don War haba kren bad ki nongthoh khubor u la ïathuh ba kane ka sienjam ka long ban pynkhlain ïa ka rukom treikam jong ka party ym tang ha ki block hynrei ha ki distrik bad khamtam eh ha Shillong City.
Lah ban kdew hangne ba kane ka jingpynkshem ai u Bah Manroibha Kharpuri kum u President ba thymmai kadei hadien ka jingresaiñ noh jong u President barim na ka party.
