Shillong, Nohprah 19: Ka Khun Hynñiewtrep National Awakening Movement (KHNAM) kaba dei ka seng saiñ pyrthei hapoh ka jylla ka la pynbna ïa ka kyrteng jong u Bah Ericton Swer uba dei ruh u President jong ka State Youth Wing ka KHNAM u ban long kum u kyrtong jong ka seng u ban ïakhun ïa ka elekshon MDC napoh ka Nongthymmai Constituency.
Katkum ka kyrwoh ba la phah da u General Secretary jong ka KHNAM u Bah James Neng u la ong ba ka KHNAM hadien ba ka la shim ïa ka rai ban ïakhun ïa kane ka elekshon sha ki Autonomous District Council ka la pynmih ruh ïa ka thup kyrteng kaba nyngkong da ka jingsngewskhem ba ki kyrtong jong ka, kin poi sha ka thong jong ka jingjop.
Haba ïakren pat bad u President jong ka KHNAM Central Body u Bah Thomas Passah u la ong ba ka kyrteng jong u Bah Ericton Swer ka dei ka Additional List bad na ka liang ka seng ka dang pyrshang ban pynmih pat sa ïa ka thup kyrteng kaba ar ha une u bnai Nohprah.
“Baroh 8 ngut ki kyrtong ba la dep ban pynmih ha ka thup kaba nyngkong kidei hi ki nongkitkam jong ka seng bad kidei ruh kiba la bishar bniah bha da ka KHNAM khnang ba baroh kin ïoh ïa ka jingjop ha kane ka elekshon sha ki District Council,” ong u Bah Passah da kaba pynpaw ruh ba na ka liang ka seng ka sei shwa ïa ki kyrtong kiba dei ruh ki nongkitkam jong ka seng naba ki dei kiba la tip bad sngewthuh bha ïa ki rukom treikam bad ki nongrim jong ka party.
