Shillong, Rymphang 20: Ka Sorkar jylla ka la thung da u Administrator ha kaba ïadei bad ka jingthmu ban khang noh ïa ka CMJ University.
Ïa ka jingpynbna la pynmih da u Commissioner & Secretary ba khmih ïa ka tnat pule puthi u Vijay Kumar Mantri ha ka sngi Palei ha kaba u la ong, “Haba bud ïa ka jingpynmih ka jingbishar da ka Supreme Court of India kaba 13 tarik u Rymphang, 2025 bad katkum ka section 48 jong ka CMJ university Act, 2009, u Lat ka jylla u la thung ïa u Bah D Lyngdoh, Joint Secretary ka sorkar jylla uba khmih ïa ka tnat Pule puthi ban long kum Administrator ka CMJ University Meghalaya.”
Na ka liang ka sorkar ka la ong ruh ba u Administrator un sa pyntreikam ïa ki kyndon ha kaba ïadei bad ka jingkhang ïa ka University katkum ba la mynjur da ka sorkar jylla.
Ha ka 14 tarik u Rymphang, laingut ki heh ophisar halor ka jingbthah da ka sorkar ki la leit jurip ïa ka campus jong ka CMJ University kaba don ha Jorabat ban khmih ba ka shongsuk shongshngaiñ kadei ban don ha kane ka jaka pule.
Kane ka kynhun ka la bthah ruh ban khang noh ïa baroh ki financial transaction, ka kam administrative bad ki kam pule puthi bad ban pynthikna ba kino kino ki tiar kim dei ban jah na kane ka jaka pule, kaba kynthup naduh ki file, computer, hard disk, bad kiwei ki tiar.
Ïa kane ka kam la shim hadien ka jingshim bishar ba la pynmih da ka Supreme Court ha ka 13 tarik u Rymphang, kaba hukum ba dei ban khang noh ïa ka CMJ University ha Meghalaya, da kaba pynskhem ruh ïa ka rai jong ka jylla ba dei ban khang ïa kane ka jaka pule ha ka snem 2014 halor ki jingkynnoh ba ka leh thok ïa babun ki samla pule da ki syrnot degree ba shu thok.
Kane ka jingphah khang jong ka sorkar ka la lam ruh sha ka jingtohkit kam runar pyrshah ïa ki pulit ka jylla pyrshah ïa ka university, u Jha bad ka ïing ka sem jong u ki dei ki nongpynïaid ïa ka CMJ Foundation, ha kaba la kynnoh ba ki la thok ïa kiba bun ki samla pule da ki syrnot thok tang na ka daw ba kin kamai pisa.
Na ka liang ka Enforcement Directorate (ED) ka la dep ruh ban register da ka money laundering case bad katkum ka jingong jong ka ED ha u Nohprah ha ka snem ba la dep, kumba 20,570 tylli ki degree ba shu thok la ai da ka CMJ University hapdeng ka snem 2010 bad 2013.
