Khliehriat, Jylliew, 3: Ka tnat Pulit jong ka East Jaiñtia Hills District ka pynpaw ka jingsngewkmen halor ka jingwan poi jong ki nongjngohkai pyrthei sha East Jaiñtia Hills District ban sakhi ïa ka jingitynnad jong ki lum ki wah, ki kshaid bad ki riti dustur, bad ha kajuh ka por ka tnat Pulit ka la kyntu ba ki dei ban da phikir bha.
Khnang ba ka jingwankai sha kane ka District kan long ka jingwan bad jingleit kaba suk ba saiñ bad kaba pynsah jingkynmaw bad dap da jingkmen, ka tnat Pulit ka la kyntu ïa ki nongjngohkai pyrthei ba ki dei ban da pyntip ha ki paralok ne hano hano ïa ka jingthmu jong ka jingleit jong ki khamtam lada ki thmu ban leit sha ki jaka kiba kham sha kyndong ne sha jngai, ki dei ruh ban da peit bad bishar bha ïa ka jinglong jingman jong ka mariang bad ka suiñ bneng khamtam ha kaba kum kane ka aiom slap.
La bthah ruh ba lada ki nongjngohkai pyrthei ki donkam jingiarap ha kano kano ki por ba ki donkam kyrkieh, kim dei ban sngew artatien eiei ha kaba ki lah ban pyntip sha kine ki phone number na ka tnat Pulit jong ka East Jaiñtia Hills District: Police Control Room +916009352499, NERS-Meghalaya – 112, O/C Khliehriat Police Station – 7085809941, I/C Lad Rymbai Outpost – 7005548966, O/C Lumshnong Police Station – 6909316114.
