Shillong, Jylliew, 03: Ka kashari jong ka Special Judge (POCSO) East Khasi Hills, Kong M.K. Lyngdoh ha ka hukum ba la pynmih ha ka 29 tarik, Jymmang ka la rai pynrem ïa u nongleh kam bymman hapoh ka Special POCSO C/No.49/2021 ba la register case ha Sohra Police Station ha u snem 2020 hapoh ka Section 3 (a)/4/5(I)/6/7/8/9/10 POCSO Act pule lang bad ka Sec 354/354A/354B/375 (sixthly)/376(2) (j) (n)/503/506 IPC da kaba phah set along ïa u Bah Pynskhem Mawa haduh 10 snem bad daiñ kuna T.30 hajar kum ka jingpynshitom hapoh ka Section 4 of POCSO Act bad lada um lah ban siew ïa ka kuna un hap ban bteng ïa ka jingshong along sa 4 bnai.
Ïa une u runar la rai pynrem ruh da kaba set along 20 snem ryngkat ka jingdaiñ kuna kaba T. 50 hajar kum ka jingpynshitom hapoh ka Section 6 of POCSO Act bad lada um lah ban siew ïa ka kuna un hap ban shong along sa 6 bnai.
U kyrwoh ba la phah da u Superintendent of Police East Khasi Hills Bah Vivek Syiem ula pyntip ba ïa une u runar la rai pynrem ruh ba set along 3 snem ryngkat ka jingdaiñ kuna kaba T.10 hajar kum ka jingpynshitom hapoh ka Section 8 jong ka POCSO Act bad lada um lah ban siew ïa ka kuna un hap ban shong along sa 2 bnai.
Ïa u runar la rai pynrem ruh ban set along haduh 7 snem ryngkat ka jingdaiñ kuna kaba T.20 hajar kum ka jingpynshitom hapoh ka Section10 jong ka POCSO Act bad lada um lah ban siew ïa ka kuna un hap ban shong along sa 3 bnai.
Ka Kashari ka la rai pynrem shuh shuh ïa u runar da kaba hukum ban set along 2 snem ryngkat ka jingdaiñ kuna kaba T.10 hajar kum ka jingpynshitom hapoh ka Section 506 IPC bad lada um lah ban siew ïa ka kuna un hap ban shong along sa 2 bnai.
Ïa ka case la tohkit da ka WP/SI V. Diengdoh jong ka DEF bad mynta ka trei ha Sohra Police Station.
