Nongpoh, Naitung, 06: Hadien ka jingkynshew shitom ïaka pisa shnong bala pynlum bun snem, ka Dorbar Shnong Lumdaitkhla Bhoirymbong hapoh ka jingïalam u Rangbah Shnong Bah ST Rympei, u Secretary Bah R Rymbai bad kiwei ki riew rangbah, kila shim da ka sienjam ban ai jingïarap ïa 4 tylli ki dong jong ka shnong Bhoirymbong da ki tiar ki tar jingdonkam ba kynthup naduh ki mohkhiew, wait, lyngka, tyrpal, bad kiwei kiwei ki tiar donkam sha ki paidbah nongshong shnong.
La thied ïa kine ki tiar lyngba ka pisa kaba la kynshew shitom da ka shnong, ryngkat ka pisa kaba tam hadien ba la dep pynlut na bynta ban shna ïaka iing Dorbar bad saw tylli ki iing ICDS ha Khlieh Shnong, Lum Mawria, Sohriman bad Khapmara kiba dei ki dong jong ka shnong Bhoirymbong.
Ïa kitei ki tiar la sam bad aiti sha ki longkmie, ki riew rangbah bad ki samla na kitei ki saw dong, bad kane ka la long ka sienjam kaba sngewkmenha kaba naka liang u Bah ST Rympei kum u Rangbah Shnong u la pynpaw ba ka shnong ka la lah ban poi sha kane ka thong dei namar ka jingïatreilang jong ki dkhot ka Executive Committee lem bad ki paidbah nongshong shnong bad kyrmen ruh ba ka shnong kan nangkiew shakhmat ha ka bha ka miat bad ki liang baroh.
Ki paidbah nongshong shnong jong ki 4 tylli ki dong kiba la ïoh ia kine ki tiar, ki la pynpaw ka jingsngewkmen bad ai ka jingïaroh sha ka Dorbar Shnong, namarba kane ka dei ka sien ba nyngkong ba kum kine ki tiar la lah ban sam paidbah bad ki dei ki tiar kiba ai jingmyntoi laka long haka por sngewsih ne ka por lehkmen.
