Da ki syrnot bad shithi thungkam sam u CM sha ki samla pule ka Don Bosco Technical School
Shillong Jylliew 28 : U Myntri Rangbah ka jylla Conrad K Sangma mynta ka sngi Balang ula leit jurip ïa ka Don Bosco Technical School, Shillong bad sam ïa ki Syrnod (Certificate) bad shithi thung kam (Appointment Letter) sha ki samla kiba la pyndep ïa ka jingpule ka jong ki ha katei ka tnad pule.
Haba ïakren bad kine ki samla pule u Conrad K Sangma ula ong, “Nga lah ban ïohi ïa ka dur khmat jong ka jingtrei shitom bad jingthaba bad ka jingthrang jong phi baroh ban leh eiei bad kane ka long kaba kongsan tam haka jingim bad u bynrap ba ki samla ki dei ki borbah jong ka jylla bad ka ri hynrei ki don pat ki jingtynjuh ban pyndonkam ïa ki samla ha ki kam ki bapher bapher kiba long ha ka lynti ka ban tei”.
Ula ong, ba ka sorkar ha ki snem kiba la leit ka la ïaid ha kata ka lynti ban pynwandur ïa ka map da ka jingstad saïan ïa ka jingdonsap ki samla ka ban ïarap ha ka ban kyntiew ïa ka ïoh ka kot jong ka jylla bad ban pynneh ïa ka lawei.
U Myntri Rangbah ula ïaroh ïa ka Don Bosco Technical School ïa u synniang uba ka la noh sha ka imlang sahlang.
“Ka jingbun ki samla kiba la pass na kane ka jaka pule ka kham heh shuh shuh haba kynthup lang ïa ka jingpass jong kiwei pat ki Technical School kiba don ha ka jylla bad nga ai khublei ïa ka Don Bosco Technical School ïa ka kam kaba khraw kaba kala leh” ong u Conrad.
Ula ong ba ka sorkar ka la buh ïa ka thong ban thaw haduh 5 lak tylli ki kam ha ki liang bapher bad pynthikna ba ka sorkar kan ïatreilang bad ka Don Bosco Technical School ha ka lynti kaba heh ban pynurlong ïa katei ka thong.
“Ka Don Bosco Technical School kan dei ka kynhun kaba heh ka ban ïatreilang bad ka sorkar jylla ban kyrshan bad ban ïarap mar kylliang bad ban pynheh ïa ka thong bad ïa ka jingangnud kaba ngi ïa don lang bad ban lah ruh ban pynurlong ïa katei” ong u Myntri Rangbah.
Ula kyntu ruh ba dei ban kyntiew ïa ka Technical School bad ban pyniar shuh shuh ïa ka jingai jinghikai ban ïaid katkum ka jingdawa ka por bad ki kor ki bor.
U Myntri Rangbah ula ïakren ruh bad ki samla pule bad jubab ruh ïa ki katto katne tylli ki jingkylli ha kaba ïadei bad ka sap ka phong, ka ïohkam ïohjam bad ki polisi treikam jong ka sorkar jylla na ka bynta ki samla.