Da ki snem hong dum khlem bording ka Bataw Dong Mihsngi, pynpaw ka JNC ha ka MePDCL

Khliehriat, Nailur, 17: Ka Jaiñtia Natinal Council –Southern Border Zone mynta ka sngi, ka 17 tarik u nailur 2024, hapoh ka jingïalam u General Secretary, u bah Marbaitlang P Suchiang ha ryngkat ka jingdon lang u Finance Secretary JNC-SBZ, u bah Baitmon Biam ka la leit ban ai da ka dorkhas ha u Executive Engineer jong ka tnat bor ding, MePDCL, Khliehriat Division ban pynsngew ha kaba iadei bad ka jingeh kaba ki paidbah jong ka shnong Bataw Dong Mihsngi ki ïakynduh halor ka jingbym ioh bording kaba da ki snem tang namar ka jing bym pat ioh ïa u transformer
“Ngi Sngewthuh ba ha kine ki sngi ba mynta ban im khlem ka bording ka long kaba eh haduh katta katta, namar la jan baroh ki jait kam, la ka dei ha ka kam ïing ne kiwei kiwei ki jait kam ka bording hi ka long kaba kongsan tam, hynrei sngewsih pat ba mynta ki paidbah jong ka shnong Bataw Dong Mihsngi ki hap ban im hapdeng ka jingdum da ki snem tang namar ba ka tnat MePDCL Khliehriat Division kam lah ban pynioh ïa ka macine transformer ha katei ka shnong Bataw Dong Mihsngi bad kane ka jingleh jong ka tnat bor ka sorkar ka la long shaba palat bad ka bym sngew lah ban pdiang” ong u kyrwon na u M.P Suchiang, General Secretary JNC-SBZ.
Ki nongialam ka JNC-SBZ ha ka jingïakynduh bad u Executive Engineer ki la dawa bad kyntu na ka tnat treikam jong u ba ka dei ban phai khmat sha kane ka dong kaba ha ka shnong Bataw kaba la buh jingeh ïa ki paidbah jong ka shnong Bataw ha ka Dong mihsngi, ka seng ka kyntu ba dei ban pynioh noh kloi kloi ïa u transformer khnang ba kan long ka jingkyrkhu bad ka jingmyntoi ïa ki paid nongshong shnong, namar ban shu im ha ka jingdum ha kum kine ki sngi ka long shisha kaba shitom bad ba sangsot, ka seng ka la kyntu ruh ba dei ban bujli noh ruh ïa ki post electrict kiba lah jot la pra kiba la buh jingma ïa ki paidbah kiba don hapoh ka shnong Bataw khnang ban lait na kino kino ki jingmynsaw hadien habud, pynkut u kyrwoh na u Nah Marbaitlang P. Suchiang.