Mawkyrwat, K’lyngkot, 14: Ka United Hynñiewtrep Movement (UHM) jong ka Mawkyrwat Circle mynta ka sngi ka la ïoh ban noh synñiang da ki jaiñ kup thiah sha ki briew kiba thiah pang hapoh Mawkyrwat CHC, South West Khasi Hills District ha kaba ïa kane ka kynhun la lam khmat da u bah Joy Wanniang, Relief Secretary jong ka UHM Mawkyrwat Circle bad uba bat ruh kum President jong ka UHM Mawmerang Unit.
Lah ban kdew ba kiba thiah pang hapoh kane ka Mawkyrwat CHC haduh mynta ïa kaba ka UHM Mawkyrwat Circle ka la ïoh ban noh synñiang ki don baroh 28 ngut.
U bah Joy Wanniang, Relief Secretary jong ka UHM Mawkyrwat Circle haba kren ha ki lad pathai khubor u la pynpaw ka jingsngewkmen ban ïoh kane ka lad ban ïadon bynta lang bad ki briew kiba donkam ka jingïarap ha kaba mynta ka kynti ki la ïoh ban leh ei ei na ka bynta ki briew kiba thiah pang hapoh jong ka Mawkyrwat CHC. “Ka jingïoh ban noh synñiang jong ki kam long kaba heh hynrei tang kum ka dak jong ka jingaimynsiem bad ïasnohktilang lem bad ki, ngi la ai da ki jaiñ kup thiah ïa ki 28 ngut ki nongthiah pang hapoh ka Mawkyrwat CHC”, ïathuh u bah Joy.
Namarkata, u la kyrpad rit ba kin pdiang ïa kine ki jingaisngewbha watla ki long kiba rit kin long pat ki jingmyntoi haba ki pyndonkam ha ka thaih ka dem kum kane ka por tlang. Ha kajuh ka por u kyrmen ruh ba U Blei Trai Kynrad na jrong Un nym ieh noh ïa ki ha kum kane ka por hynrei Un sa ai noh ha ki ïa ka met kaba koit kaba khiah ba kin lah ban pyndep ïa ki kam kiba bun khamtam eh ban sngewnguh ïa U Nongthaw Uba long U tynrai jong ki jingkyrkhu baroh.
Haba kren pynkut u bah Joy u la pynpaw ruh ka jingaikhublei na ka bynta ki nongtrei hapoh jong Mawkyrwat CHC kiba la ïaleh shitom ban pynbiang ïa ki kyrteng jong ki nongthiah pang bad kaba la wanrah ruh ka jingïaid beit ïaid ryntih jong ka kam.
Nalor ki nongthiah pang hapoh Mawkyrwat CHC, na ka liang ka United Hynñiewtrep Movement (UHM) jong ka Mawkyrwat Circle ka la ïoh ruh ban leit ai jingïarap ïa ki briew kiba donkam ki lad jingïarap sha shnong Marshillong, Mawranglang bad Mawlangwir.
Ha kane ka sngi la synrang lang da ki nongkitkam bad ki dkhot jong ka United Hynñiewtrep Movement (UHM) jong ka Mawkyrwat Circle.
