Shillong, Naitung 19: Ka Kynhun Myntri ka Sorkar jylla ha ka sngi ka la pynskhem bad mynjur ïa ka jingtyrwa ban ai kyrteng biang ïa ki 10 tylli ki surok bad 2 tylli ki ïing.
Hadien ka jingïalang ka kynhun Myntri, u Myntri Rangbah ka jylla u Conrad K Sangma u la ong ba ki la don haduh 10 tylli ki surok kiba la ai kyrteng biang bad artylli ki dei ki ïing.
U la ïathuh ba ka approach road na national highway 217 sha Bagmara Bong Market kaba jngai kumba 1.7 kilometre, yn ai kyrteng kum ka captain Williamson Sangma road, kumjuh ruh ka Raitong building la tyrwa ban ai kyrteng da ka Lum Shillong building.
U la ong ba ka don ka jingtyrwa na ka bynta ka surok na Sohra Gate Nongsawlia lyngba ka Saitsohpen sha surok Mawsmai ban ai noh da ka kyrteng U Thomas Jones road.
“Ka la don ka jingtyrwa ban ai kyrteng ïa ka surok na Mawkhar Community Hall sha Jaïaw Langsning community hall kaba jrong kumba 800 metre ban ai kyrteng da ka Dr Hugh Gordon Robert road, nangta ka GNM school of nursing Nongpoh ban ai kyrteng da ka GNM school of nursing Pahamsyiem Nongpoh,” u la ong.
“Kumjuh ruh ki la don katto katne ki jingai jingmut kiba la mih kum ka nuksa ïa ka surok ha Tura na surok ka PA Sangma kaba leit sha Holy Cross Hospital kaba mynshwa la ai da ka kyrteng Holy Cross road yn khot noh mynta da ka Bishop Mamlassery road uba la sdang ïa ka Holy Cross Hospital bad kum ka dak ruh ka jingkynmaw ïa u,” u la bynrap.
