Nongpoh, Naitung 30: Da ki hajar ngut ki khun ki hajar ka Hima Jirang mynta ka sngi ki la mih paidbah bad pynpaw ïa ka jingbitar kaba jur, hadien ba ka Shnat Hima Nongwah Mawtamur Sohiong Lyngdohship, ka la thmu ban wan klun jubor ïa ki jaka ba hap ha ka Hima Jirang ba don ha ka thaiñ Rani ha khappud ka Meghalaya bad ka Assam.
Da ka jingbitar kaba jur, na kane ka jingthmu klun jaka ka Shnat Hima Nongwah Mawtamur Sohiong Lyngdohship ïa ka jaka ka Hima Jirang ha Rani Jirang, u Syiem ka Hima Jirang lem bad ki khun ki hajar ki la thmu ban hiar sha katei ka jaka ba ka Shnat Hima Nongwah Mawtamur Sohiong Lyngdohship ka la thmu ban plie da ka ophis treikam ba pura ha ka shnong Rani Jirang.
Ban tem halor kane ka jingjia ban lait na ka jingshah ktah ha ka shongsuk ka shongsain ki paidbah katei ka thain halor kane ka jingthmu ban plie ïa ka ophis treikam ka Shnat Hima Nongwah Mawtamur Sohiong Lyngdohship ha Rani Jirang, u Deputy Commissioner ka Ri Bhoi, u la pynjari da ka section 173 BNS na ka bynta ban khanglad ha ka jingïalum paidbah kaba lah ban ktah ïa ka shongsuk shongsain ki paidbah ha kaba naduh ki bor Pulit na Ri Bhoi bad ki Bor Distrik, ki la poi sha katei ka jaka bad ban khang na ka jingïalum paidbah.
Haba kren sha ki lad pathai khubor, u Paiem H. Wahalng, u la ong ba ka Hima Jirang ka sngewlyngngoh haduh katta katta halor ka jingthmu ban wan kam jubor da ka ka Shnat Hima Nongwah Mawtamur Sohiong Lyngdohship, kiba la kam ba katei ka jaka ha Rani Jirang ka hap ha u pud u sam jong ki bad kham sngewlyngngoh mynta da ki spah snem mynshwa ym shem la don kano kano ka jingkam jaka bad mynta pat la shu thmu ban wan kam jubor ïa katei ka jaka kaba hap ha ka Hima Jirang.
Shuh shuh, u la ong ruh ba ka Hima Jirang ryngkat ki khun ki hajar kin nym pdiang ïa kane ka jingkam jaka ka shnad Hima Nongwah Mawtamur Sohiong Lyngdohship bad lada ki dang wan kam jubor kum ka Hima bad ki khun ki hajar ki hap ban ïa khun pyrshah la ka dei ban ïaid da kano kano ka lynti, u la bynrap.
