Nongpoh, Jylliew 06: Ban ai jinghikai sha ki paidbah nongshong shnong ka Shnong Mawphrow ha Ri Bhoi bad ruh shi bynta ban pynneh pynsah ïa ka mei maraing, ka Ri Lajong Farmer Produce Organization, Ri Bhoi ha ka 5 tarik u Jylliew 2023 ka la pynlong ïa ka jingrakhe ïa ka sngi pynneh mariang ba la tip paidbah kum kata ka ‘World Environment Day’ ha ka Shnong Tumenpenlong ha Ri Bhoi District.
Ïa kane ka jingrakhe ïa kane ka sngi pynneh mariang la wan shim bynta da ka Kong Marian Maring, President ka Ri Lajong Farmer Produce Organization kum ka kongsan bad la sakhi lang ruh da ka jingdon lang u P.S Toor, ki nongrep bad ki paidbah nongshong shnong katei ka shnong Tumenpenlong.
Lyngba jong kane ka sngi, ka Ri Lajong Farmer Produce Organization nalor ba ka la thung bun ki tynrai dieng bad la thung ruh ki tynrai dieng ba long dawai ha katei ka shnong ba la shim bynta lang da ki nongrep bad ki nongïalam kane ka seng ki nongrep.
Haba ai jingkren ha katei ka sngi, ka Kong Maraian Maring ka la ïathuh ba na ka liang ka Ri Lajong Farmer Produce Organization ka la ju rakhe man la u snem ïa kane ka sngi pynneh mariang da kaba thung bun ki tynrai dieng bad ka thong hi ka long ba shim lang kata ka jingkitkhlieh na ka bynta ban pynneh pynsah ïa ka mariang.
Ka la ong ruh ba kum ka seng ka la thung ruh ïa kine ki tynrai dieng ba long dawai ka dei ruh shi bynta ba kito kiba don jingtip kin lah ban pyndonkam dawai bad ha kajuh ka por ruh ka long ban pynneh pynsah ïa ka mariang.
Shuh shuh, ka la buh ruh ka jingkyntu kynpham ïa ki paidbah bad khamtam ki nongrep ba ki dei ban don lang kata ka jingkitkhlieh ban ïada ïa ka mariang, namar ka jingma kaba khraw bha kaba ap ha kine ki sngi ka dei ka jingshah pynjot ka mei mariang na ka bynta ka jingdonkam u khun bynriew bad bun pat kim sngewthuh ban shim kata ka jingkitkhlieh ban ïada ne pynneh ïa ka mei mariang, ka la bynrap.
