Shillong, Nailar 30: Namar ka jingjyllei ki nongkloh pla bad kiwei pat ki kam sniew ha ïewduh ka Hima Mylliem da ka jingkyrshan lang ka KHADC mynta ka sngi ka la pyntreikam da ki CCTV bad kumjuh ruh da ka PA System.
Ïa kine ki kor ki bor la plie da u Bah T. Chyne, CEM ka KHADC ha ka jingïalang kaba la long ha Thanad jong ka Hima ha ïewduh. Ha kane ka jingïalang la don lang ruh ki EM, u Acting Chief ka Hima Mylliem, u Bah Ainam Manik Syiem, ki Myntri bad ki Ophisar ka KHADC.
U Acting Chief, u la ïathuh ka Hima ka thmu ban buh hynriew phew tylli ki CCTV, hynrei mynta la pyntreikam shuwa 24 tylli. Nangta ïa ki PA System pat la buh ha kylleng ki jaka ïew na ka bynta ban pynbna bad pyntip haba don kino kino ki kam ba donkam bad ba kyrkieh.
Haba kren ha kane ka jingïalang, u Bah Titos, u la ong ba hadien ba la mih khubor halor ka jingjyllei ki kam sniew bad ki kam tuh ha ïewduh, u la pan ïa ka jingïatreilang ki Pulit bad kumjuh ruh ula lum ïa ka jingïalang jong ka Hima Mylliem ban rai ban buh noh da ki CCTV.
Ha kane ka jingïalang la plie ruh ïa u mawnongrim ban tei ïa ka ïewdielang kaba lai mala, khnang ban pynsuk ïa ki paidbah kiba wan die ïa ki mar ha ïew. La plie ruh ïa ka jingpynbha ïa ka jaka lehniam ha ïewduh.
Ha kajuh ka por, u CEM, u la maham tyngeh ruh ïa kito ki dukan kiba dang pyndonkam plastik haduh mynta bad u la ong ba lada dang lap nangne shakhmat ïa ki dukan dei ban shu khang beit bad lada dei ki dukan bar jylla dei ban shu pynduh beit ïa ka laisen khaïi.
