Ba leh torti ka MeSEB duh ei ka longkmie ïa ka jingim, ujor sha u DC

Shillong, Nailar 30 : Ki Seng Bhalang na ri lum Garo Hills ba kynthup ïa ka GSU bad FKJGP ki la ai da ka jingujor sha u Deputy Commissioner jongka South Garo Hills halor ka jingduh ei jong ka longkmie ïa ka jingim tang na ka daw ka jingleh torti jong ki bor ba dei peit jongka MeSEB ïa ki 11 KV Sainar elektrik ba pynpoi bor ding na Nongal Bibra sha Darang Boldak.
Kane ka longkmie kaba kyrteng ka Suritha Sangma ka la duh ïa ka jingim namar ka la shah bat bor ding elektrik na utei u sainar uba la ïaid na tbian eh ba la jan tyngkhuh ha khyndew. Kane ka jingjia kala jia ha ka 18 tarik Nailar 2022 ha ka por 11 baje mynstep ha Nengbrek Gittim kaba hap ha Nongal Bibra Region.
Kane ka jingïaid u sainar natbian haduh ba la jan tyngkhuh khyndew ka dei ka jingleh torti jongka kompani FEEDCO bad u SDM ka MeSEB.Kane ym tang ba ka buh ïa ka jingim briew ha ka jingma hynrei wat ïa ki mrad ki mreng ruh kumjuh. Halor kane ki seng bhalang ki la leit ban ïakren bad u SDM ka MeSEB hynrei um shym la shim khia bad wat ka kompani FEEDCO ruh kam leh ei ei.
Kumta halor kane ki seng bhalang ki kyntu ïa u DC ban thung da ka jingtohkit bad ban ai ïa ka kaiphod sha u Myntri ba dei peit ïa ka tnad bor ding bad kumjuh ruh ban pyndam noh ïa ka MoU ba la ïasoi hapdeng ka MeSEB bad FEEDCO, kumjuh ruh ban pynshitom ïa u SDM kat kum ki kyndonk aiñ.