Nongstoin, Risaw 30 : Ki kontraktor jong ka West Khasi Hills, kiba ju ïoh ban pyntrei ïa ki jingtrei ha ki tnad treikam bapher bapher kum ka PWD, PHE, Water Resources bad kiwei kiwei, ki la kyntu jur ïa ka sorkar ba kan pyllait noh ïa baroh ka pisa jong baroh ki jingtrei kiba ki la pyndep naduh ki snem ba la leit noh kiba kam pat siew haduh mynta.
Katto katne ki Kontraktor ba kynthup ïa u Bah H.Lyngkhoi, Bah D. Sun bad Bah M.Nongrem, haba ïakren bad u nongthoh khubor, ki la ong ba ka jingpynsahteng jong ka sorkar ban siew ïa ki bill jong ki da ki bun bun snem, ka nang pynbun shuh shuh ïa ka ram sha ki Kontraktor.
Ki la ong ba ka sorkar ka la dei ban shimkhia ban ym pynsahteng ïa ki bill jong ki Kontraktor, khamtam ha kaba kum kane ka por ba ka kamai kajih bad ka ïoh ka kot jong ki paidbah ka hiran haduh katta katta. Ki la ong ba naduh ka khlam Covid-19, ka ktah ym tang ïa ki Kontraktor kiba dap ram, hynrei wat ki riew paidbah kiba im da ka bylla ka sngi ruh ba bun kiba sah ram ha ki nongai bylla.
Ki la ong ruh ba ha West Khasi Hills, 90 % ki paidbah nongshong shnong ki dei kiba im ha ki kam bylla bad ki kontraktor.
Kumta haba ka sorkar ka pynslem ban pyllait ïa ki bill, ki nongbylla ki la hap ban bam ram na ki dukan, namar kim don da kawei pat ka lad ban kamai pisa lait tang da kaba leit bylla.
Ki la ong ruh ba lada kheiñ ïa ki nongtrei sorkar haduh mynta, ha West Khasi Hills ym pat don uwei ruh u nongtrei sorkar u ba lah ban ai kam wat tang lai ngut ne saw ngut ki nongshong shnong, lait noh tang ïa kito ki nongtrei ïing kiba ki la khot khnang ban peit ïa ka ïing ka sem jong ki.
