Nongpoh, Jylliew, 27: Ki khynnah skul na ki skul bapher baher hapoh ka thaiñ Umsning mynta ka sngi ki la ïa mih paidbah ban ïaid paidbah shi bynta ban ïalap halor ka jingshah ktah na u drok, ha kaba bun ki khun samla ki la ngop bad ki la shah pynjot ha u drok.
Kane ka jingïaid paidbah ki khynnah skul bad kiwei kiba la ïa snoh kti lang ka long shi bynta ban rakhe ïa kata ka World Drug Day, kaba dei ka sngi kaba ki ïalap pyshah ïa ka jingshah ktah na u drok.
Ïa kane ka jingïalap pyrshah ïa u drok la pynlong da ka ophis u Deputy commissioner ka Ri Bhoi District bad la ïa trei lang bad ka ophis ka District Social Welfare Officer ka Ri Bhoi ryngkat ka Ri Bhoi Area Welfare Association, Ka SAELDA Jingïaseng Kynthei Ribhoi Synod bad ka Seng Samla Umsning Patarim ba la pynlong ha Umsning Auditorium Hall.
Ha kane ka prokram ïalap pyrshah ïa u drok la wan ban shim bynta ruh da u Dr. Celestine Lyngdoh, MLA ka Umsning kum u kongsan bad la sakhi lang ruh da ka jingdon lang u Bah Andrew Myrthong BDO Umsning C&RD Block kum u Symbud kongsan, Kong FS Sun DSWO Ribhoi, ki Doctor na ka tnad ka koit ka khiah, ki nongtrei ASHA bad kiwei kiwei de.
Ha kane ka sngi, nalor ka jingïalap lyngba ki jingthoh bapher bapher kiba pyrshah ïa ka jingdih drok, la pynlait paidbah ruh ïa ka jingrwai kabadei shaphang ka jingkyrni ha u drok bad la sam ruh ïa ki khusnam sha ki nongjop kiba la shim bynta ha ka Jingïakop shna Video, Shna Jingrwai bad kiwei kiwei kiba dei katkum ka thong ka Nasha Mukt Bhaarat Abhiyan.
Haba ai jingkren ha kane ka sngi, na ka liang u Dr. Celestine Lyngdoh kum u kongsan u la ai khublei ïa kiba la don bynta ban pynlong ïa kane ka prokram ïalap pyrshah ïa u drok bad kum u nongmihkhmat u la khot la wer ruh ïa baroh ki paidbah ban don kata ka jingïatrei lang ha kaba pynduhjaid ïa u drok, namar bun ki khun samla ha kine ki sngi ki la shah pynjot ha u drok, kaba dei na ka daw ka jingkynrei palat jong u drok.
