Da ka tulop ba 30-32 hajar shibnai pynap ka sorkar ïa ki 325 tylli ki kam nos ban trei shipor

Shillong, Naitung 22 : Ka tnad ka Koit ka Khiah ka sorkar jylla ka la pynap da ka tulop kaba 30,000 – 32,000 tyngka shi bnai na bynta kito ki nos kiba kwah ban trei shipor ha ki jaka sumar jong ka sorkar jylla kum ha ki First Referral Unit, ki Critical Care Unit bad kiwei kiwei.
Haba pyntip ïa kane, ka Myntri ka tnad ka Koit ka Khiah ka sorkar jylla, Dr. M Ampareen Lyngdoh ka la ïathuh ba na bynta kane, ka sorkar ka la dep ban pynmih ka jingpynbna khot pynrung kam na bynta ki 325 tylli ki kam ba lait ha kylleng ki bynta jong ka jylla kiba la donkam ban pyndap kyrkieh khamtam na bynta ki kam ban trei ha ki Laboratory, nangta ki ICU, Pharmacist nalor kiwei kiwei ki kam kiba donkam ïa ki briew kiba la tbit ha ka kam.
“Ka don ka jingduna nongtrei kaba jur bha ha ki jaka ai jingsumar ha kylleng ki bynta jong ka jylla, kum ki FRU, ICU bad kiwei kiwei ba ka sorkar India ka la ai sha ka sorkar Meghalaya,” ka la ong haba kren bad ki lad pathai khubor.
Nalorkata, ka ong ruh ba mynta ka jylla ka la don ki jaka sumar kiba biang la ka long naduh ki CHC bad PHC. “Kumta haba ïohi pat ïa ka jingduna kaba bun bha na bynta ki nongtrei ba la tbit (technical staff) kumta la ïoh ïa ka jingmang kyrpang na ka Finance Department na ka bynta kine ki kam ba thylli kum ki pharmacist, lab attendant bad kumta ngi la pynbna bad khot ïa ka jingpynrung kam ba shipor (contractual).
Shwa kane, ka ong ruh ba khnang ba ka kam kan ïaid ha ki jaka sumar, kumta khlem ki la ïaid shwa ban thung ïa kitei ki kam ba lait kum ki nongtrei ba shipor namar ki sngewthuh ba kan slem lada ap shi ïai ap.
Nalorkata ka la ong ba kine ki kam ba ka sorkar ka khot ban trei shipor kin ïoh ïa ka jingsiew kaba long 30,000 haduh 32,000 tyngka shi bnai. “Kumta na ka bynta kito ki nos ba la dep pyntbit ïalade ha ka jaka ba kin shong ha iing ki la ïoh ïa ka lad ban trei bad kyrshan lang ha iing ban ïa kaba ap ha iing ïa ka jingkhot ban thung kam pura.”
Kane ka jingpynshai jong ka Myntri kadei hadien ba shi kynhun ki nos ba trei kum ki nongtrei ba shipor ha ki hospital bapher bapher ki la wan ban kynduh ïa ka ban kyrpad ba kan pyndam noh shwa ïa katei ka jingkhot thungkam ba tang shi por ïa ki nos. Kitei ki nos ki la pynpaw ruh ba kim kwah satïa ban dang ïohi ba ki nos kiba trei borbah na bynta ka koit ka khiah jong ki nongshong shnong kin trei kum kita ki nongtrei ba shipor.
Halor ka phang kaba kitei ki nos ki pynpaw ba kim ïoh pura ïa ka shuti haba don ba kha ba pun, ka Myntri ka la ong ba kan sa shimkhia ïa kane ka bynta bad kumta kan sa kynduh biang ïa ki ha ka 24tarik mynta u bnai.