Da ka thong buh ban pyntikna ba ka jingdawa ka dei ban long marjan bad ka jinglah ban pynmih

Shillong, Naitung 16 : U Myntri Rangbah ka jylla, Conrad K. Sangma, u la ong ba ka sorkar jylla ka dang pynkhlaiñ ïa ki lad ban kyntiew ïa ka kam ri jingri da kaba buh hakhmat eh ïa ka thong ban weng noh ïa ka jingduna kaba ju don kaba ka jingdawa ïa ka mar ka kham jur ban ïa kaei kaba ka jylla ka lah ban pynmih.
Ha kane ka jingïalang la buddien ruh ïa ka jingtreikam jong ki Farm sorkar, nangta ruh ïa ki special livestock production programme jong ki sniang bad kumjuh jong ki syiar.
Haba kren sha ki lad pathai khubor hadien ka jingïalang bishar kam jong ka Veterinary & Animal Husbandry Department ha ka sngi Palei, u Myntri Rangbah u la ong ba ka jingïalang ka la bishar bniah ïa ka jingtreikam jong ka tnat bad la buh ruh ïa ki thong bad ki lad ban pynbha shuh shuh ïa ka kam.
“Kane ka long ban pyntikna ba ka ïoh ka kot bad ka kamai kajih jong ki nongrep kan kiew lang bad kumno ba ngin lah ban plie lad lang ïa ki nongtreikam lajong ba kin lah ban snohkti lang ban pynkhlain shuh shuh ïa kane ka bynta,” u la ong.
Katkum ka jingïathuh jong u, la ïakren ruh kumno ban ai lad ïa ki nongsengkam sengjam (entrepreneurs) ban rung sha kane ka bynta bad ban pynkiew ïa ka jingpynmih bad ka jingpynwandur ïa ki mar.
U Myntri Rangbah u la ong ba ka jingïalang ka la bishar ruh ïa ka bynta ba ka sorkar ka dei ban shim ban kyrshan ïa ka tnat, kynthup ïa ka jingduna ki nongtrei, ka jingpynbiang bam ïa ki jingri, ki prokram ai tika bad ka jingtei bad jingïakhmih ïa ki Veterinary Hospital. La iakren ruh halor ka jingtei ïa ka College of Veterinary Science ha Kyrdemkulai, bad khamtam ban don noh ïa ki khyrdop talasi ïa ki jingri ha Ri Bhoi bad West Garo Hills.
“Baroh kine ki bynta la ïakren bniah ha ka jingïalang. Ha ki taïew ban wan ngin sa bishar biang ïa ka action plan bad ki sienjam kiba dei ban shim ban pynurlong ïa kine ki thong,” ong u Conrad.
U la bynrap ba ka sorkar kan dang bteng ban peit bniah man ka taïew ïa ka jingïaid kam jong ki tnat bapher bapher bad ki skhim sorkar khnang ban pynkhlaiñ ïa ka jingïatreikam, ban pynlong ïa ka jingïakitkhlieh bad ban shim ïa ki lad jingïada bad jingïarap lada donkam.