Agartala, Lber 16 : Ka Development of North East Region (DoNER) kum shi bynta ban kyntiew ïa ki jingbei tyngka hapoh ka thaiñ shatei lam mih ngi, kala thaw ïa ka kynhun ba san ngut ki dkhot ka Task Force ha kaba u Myntri Rangbah ka jylla Tripura u la shah jied kum u convenor.
Kane ka Task Force ba kynthup ruh ïa u myntri ka tnad DoNER u Jyotiraditya Scindia, ki Myntri Rangbah ka jylla u Conrad K. Sangma (Meghalaya), u Neiphiu Rio (Nagaland), bad u Prem Singh Tamang (Sikkim) kum ki dkhot.
Kane ka task force, ka ban aiti ïa ka kaiphod jong ka sha ka NEC hapoh hynriew bnai, kan bishar bniah ïa ka rukom bei tyngka kaba la don lypa, kynthup ïa ki polisi, bad ki jingtei ha ka thaiñ shatei lam mihngi bad kan thaw ïa ka lynti treikam kaba kongsan ban buh ïa ka thaiñ kum ka bynta ba kyrpang ba la jied bha ban bei tyngka, ka rep ka riang, ka IT bad kiwei.
Ka kynhun treikam kan pynpaw ïa ki bynta bad ki thaiñ kiba don hapoh ka NER ban thaw ïa ki kynhun bei tyngka kiba la pynleit jingmut na ka bynta ban kyntiew ïa ki jaka pdeng jong ki bynta kum ki jaka pynmih mar rep, ki jaka jngohkai pyrthei, ki jaka IT, ki lynti ïaid jong ka bording ba lah ban pynthymmai bad kiwei kiwei.
Kane ka task force kan ai jingmut ruh ban thaw ïa ki lad ki lynti ban khring ia ka jingbei tyngka napoh ri bad nabar ri, da kaba pynleit jingmut ha ka jingïatreilang hapdeng ki riew shimet (PPPs), la ong ka jingpynbna jong ka tnad DoNER.
