Nongpoh, Naitung 08: Kum ban tynrong lem ïa ki jingeh ba kawei ka longïing baduk ka ïa kynduh jingeh na ka daw ka jingban jong ka jingduk jingkyrduh, ka Seng Hynñiewtrep Integrated Territorial Organization, Bhoirymbong Area ka la leit ban kner lem ïa ka jingïarap da kaba ka la noh synñiang da ka song pisa sha kawei ka longïing jong ka kong Julee Syiemiong ha ka shnong Umtung ba hap ha Bhoirymbong C&RD Block, Ri Bhoi Distsrict.
Haba leit ban ai jingïarap da ka song pisa sha katei ka longïing la ïalam da u President ka HITO, Bhoirymbong Area, u Bah Samuel Hinge lem ki dkhot bad la ïa don ryngkat ruh ki nongïalam ka Seng Samla Shnong Umtung ba la ïalam da u Bah G. Kharumnuid.
Kane ka jingleit ai jingïarap ka seng HITO sha katei ka longïing, ka dei hadien ba ki nongïalam ki la ioh jingtip ba ka don ka longïiing baduk ha katei ka shnong kaba donkam lem ïa ka jingïarap kiwei bad kum ka seng ka leit ban ai jingïarap da ka song pisa kaba long katkum ka jingkotbor shi bynta ban tynrong lem ïa ki jingeh ba ïa kynduh da katei ka longïing.
Na ka liang ka seng ka la kyntuh ruh ïa kiwei ki ba don mynsiem ba ïarap lem sha katei ka longïing ba kin phai khmat lem bad khamtam ki nongmihkhmat bad kumjuh ruh ka bor shnong ba kin leit ban pan jingïarap na ka sorkar ba ka bhah kyrpang ruh da ka skhim PMAY kaba dei kawei ka skhim ba pyshna ïing baduk na ka liang ka ka sorkar kmie.
