Shillong, Nailur 13 : U CEM ka KHADC, Bah Pyniaid Sing Syiem ha ka sngi Balang u la pyntip ba ki la dep ban pan jingpynshai na ki nongpyniaid jong ki khyrdop khrong pisa hadien ba ka la mih ka jingujor pyrshah.
Haba kren bad ki lad pathai khubor, u CEM u la iathuh ba kitei ki khyrdop kidei kiba la don naduh mynshwa naduh ki Executive Committee barim bad kim dei satia kiba dang thymmai. “Shwa ba kan don ka jingkhang da ki bor distrik ka Ri Bhoi ia ka toll gate jong ka KHADC, na ka liang jongngi ha ka taiew ba la dep, ngi la pan jingpynshai na kitei ki toll gate hadien ba ka la don ka jingujor na ki seng jong ki nongñiah trok haba iadei bad ka jingthur jong ki nonglum,” u la ong.
U la iathuh ruh ba ka Council ka la ai por shi taiew bad ka jingai por ka kut mynta ka sngi hi. “Lada kim jubab bad lada ki iaid palat na kaba la bthah da ka Council, te ngim banse ban khang wat na ka liang jongngi ruh,” bynrap biang u CEM.
La iathuh ruh ba bun na kitei ki khyrdop kidei kiba la aiwai ha ki kynhun shimet. U la kubur ruh ba lada don san tylli lehse wei ar tylli kin don ki nongwai kiba leh thurmur ia ka kam haba iadei bad ki kali kiba wan rung sha Meghalaya kiba kit mar kit mata. U la iathuh ruh ba ha kito ki jaka ba ïoh ia ka jingujor, ka Council ruh ka la pan jingpynshai na kitei ki nongshim wai.
