Da ka shithi phah u Bah Sanbor sha u Himanta ban ym thut ka jingpynpoi ïa ki masi sha Meghalaya

Shillong, Nohprah 12 : U MLA ka Shillong South, Bah Sanbor Shullai u la thoh da ka shithi sha u Myntri Rangbah ka Assam, u Himanta Biswa Sarma ban pyntikna ba ka jingpynpoi ïa ki masi sha Meghalaya kan ym thut satia.

“Ka dei ka jingshisha kaba la tip paidbah ba ka masi kadei ka jingbam ba kongsan tam jong ki paidbah ka jyllla bad kumba 60 persen jong ka jingdonkam doh masi la wanrah na kiwei ki jylla. Kumta ha kyrteng ki paidbah ka Meghalaya, nga kwah ban kyrpad ïaphi ban tuklar lang khnang ba ka jingpynpoi ïa ki masi  sha Meghalaya kan ïaid beit lyngba ki nongkhaii bad ki kali kiba la pynbiang ïa ki kot ki sla ba donkam ba la ai da ki bor sorkar,” u la ong ha ka shithi sha u Himanta.

Shuh shuh u ong ruh ba kitei ki jingkdew haneng ka long da kaba buh hakhmat ïa ka rukom bam jong ki paidbah ka Meghalaya bad kam don jingïadei satia bad ka jingsngew niam jong kano kano ka kynhun niam bad ba ki paidbah ka jylla ruh kim don satia kano kano ka jingpyrshah ïa kano kano ka jingngeit hynrei ki burom ïa ka kolshor bad ka jingngeit jong kiwei pat.

Haba pynpaw ïa ka jingsngewkhia halor ka jingkhang doh masi ha Assam, u Bah Sanbor u la ong, “Kumba phi tip ka thaiñ shatei lammihngi ka kynthup ïa ki Jaitbynriew bapher bapher bad ki trai ri trai muluk kiba ka rukom bam jong ki ka ïahap bad ka kolshor jong ngi, kumta ngi ki paidbah ngim pyrshah ïa kano kano ka niam bad ngim kwah ruh ban pynmong ïa ka jingsngew niam jongno jongno ruh.”

Tangba u ong pat ba ka jingkhang doh masi dang shen ha Assam ka la wanrah ka jingkulmar jingmut ha ka jylla.

“Kumta ka la don ka jingpynsngew da kito kiba pyrshah ba kane ka dei ka buit treikam ba rieh jong ka NDA ban khang bam doh masi ha baroh kawei ka ri. Watla na ka por sha ka por la dep ban pynshai da ki nongïalam bahalor ba ka rukom bam kadei ka bor jong ka sorkar jylla hynrei kiba pyrshah ki shim ïa kane ka lad ban pynphriang ïa ka khubor kaba bakla hapdeng ki jaidbynriew jong ka jylla bad ka thaiñ,”u la bynrap biang.

U la ong ba ka jingkhang doh masi ha Assam ka la buh jingeh ïa ki nongshong shnong ka jylla Meghalaya namar ka jingkiew dor jong ka doh masi da kaba buh hakhmat ba la jan ka samoi Khristmas bad Snem Thymmai.

Haba pynpaw ba ka jylla Meghalaya ka dei ka jylla kaba don lynti beit tang lyngba ka Assam, u ong ruh ba ki nong Meghalaya ki dei kiba im ha ka rep ka riang, ri masi khem dud, bad kiwei ki jait kam ba ïadei lang ha ka kam ri jingri. U ong ruh ba ki nongkhaii masi pat ki kynduh bun ki jingeh namar ka jingdon jong bun ki kyndon jong ka Assam Cattle Preservation Act, 2021.

  Nalorkata, u Bah Sanbor u la ong ruh ba u Myntri Rangbah ka Assam u dei nongïalam ba radbah na bynta baroh ki nongialam seng saiñ pyrthei jong ka thaiñ shatei lam-mihngi jong ka Ri.

“Phi dei u nongïalam na ka bynta baroh ki nongïalam saiñpyrthei ha kylleng ka thaiñ shatei lam mihngi bad ngi kyrmen ba phin bteng ban pynpoi ïa ki kam pynroi bapher bapher jong phi na ka bynta ka Assam bad kiwei kiwei ki jylla thaiñ shatei lammihngi da ka jingïohi jngai kaba kham jylliew ha ka thaiñ,” u la ong.