Da ka Section 144 CrPC pynjari ha SWKH, mana ban ïalum briew palat ïa ka 5 ngut

Mawkyrwat, Lber 19: Kum shibynta ban pynthikna ïa ka jingshongsuk bad jingïaid beit ïaid ryntih ha ka Lok Sabha Election 2024 hapoh ka South West Khasi Hills District, na ka liang u District Magistrate bad District Election Officer jong ka South West Khasi Hills District u la pynmih ïa ka hukum hapoh kyndon aiñ 144 CrPC ha kaba la khang ban pynlong jingïalang bad jingïalum briew palat ïa ka 5 ngut khlem ka jingïoh jingbit na ki bor distrik bad la mana ruh na kaba rah ïa ki tiar siat ne ki tiar pynmynsaw.
Shuh shuh ha kawei pat ka hukum ba la pynmih da u District Magistrate u la khang ban thoh ne draw ha ki kynroh, ban tah lane wah ïa ki poster, ki kot lane kino kino ki jingthoh ne jingpynïeng ïa ki banners, ki hoardings bad kumta ter ter ha ki office sorkar ne jaka sorkar.
Shuh shuh, la khang ban thoh ki jingthoh ha ki kynroh, ban tah lane wah ïa ki poster/kot, ki banners, ki hoardings lane kino kino ki jingthoh kiba ha kano kano ka rukom ha ki kynroh ne ha ki jaka jong ki riew shimet khlem da ïoh ia ka jingbit (NOC) da ka jingthoh na ki trai jaka bad na ka ophis jong u District Election Officer.
Ym shah ban pyndon-kam ïa ka tiar pynsaw naduh 10 baje mynmiet haduh 6 baje mynstep.
Yn ym shah ban pynlong jingïalang ban ïalap elekshon khlem da pan bad ïoh jingbit na ka ophis u District Magistrate kumjuh ruh ka jingbit na ka shnong ha kaba ïadei bad ka jaka ban pynlong ïa ka jingïalang.
Kiba pyndonkam ïa ka tiar pynsaw nr Loudspeaker khlem ïoh jingbit na u District Magistrate kin shah pynshitom ha ki Local Authorities. Ym shah ban pynlong jingïaid paidba ne rallies/procession khlem ka jingai jingbit na u District Magistrate.
U District Magistrate u la pyntip ba ka khanglad ïa ka jingthong pisa ha ka por elekshon, ka Election Commission ka la pynmih ïa ka hukum ban pynthikna ba baroh ki nongthep vote kin ïoh lad ban pyndonkam ïa ka hok jong ki khlem jingsheptieng lane jingshah pynbor namar ki lah ban don ki briew ki ban rah bun pisa na ka bynta ban khring bad thong da ka pisa ïa uno uno u kyrtong uba ki mon bad lada ailad ïa kiba kum kita ka lah ban wanrah ïa ka jingbym ïaid beit ïaid ryntih ha kane ka elekshon bad kaba lah ban lam sha ka jingïakajia, ka ïashoh ïadat hapdeng ki paidbah bad kaba lah ban poi shaduh u pud ban pynthut ïa ka shongsuk shongsaiñ hapoh ka South West Khasi Hills District.
U District Election Officer jong ka South West Khasi Hills District u la pynjari da ka hukum hapoh ka kyndon aiñ 144 CrPC ha kaba la mana ïa uno uno ne kano kano ka briew ne kano kano ka kynhun na kaba rah pisa palat ïa ka T. 50 hajar (sanphew hajar shaneng) hapoh u pud u sam jong ka South West Khasi Hills District.
Kane ka hukum kan treikam shisyndon tad haduh ban da kut ka por elekshon.