Da ka Save Hynñiewtrep Mission buh ki 5 Seng ïa ki mat ka jaidbynriew

Shillong, Risaw 24: Khyndiat bnai shuwa ba ka bor treikam jong ka sorkar jylla kan kut noh namar ka jingwan ka ilekshon jied nongmihkhmat thymmai bad ka jingpynjari ïa ka Model Code of Cunduct ki san tylli ki seng bhalang ba kyntup ïa ka HYC, HANM, JSM, EJNC bad CoRP ki pynmih da kawei ka mission kaba ki ai kyrteng ka “Save Hynñiewtrp Mission” ban dawa ba ka sorkar ka dei ban pynrurlong noh ïa ki 9 tylli ki mat kiba ka jylla ka angnud kata ka ka ILP, ka Them Iewmawlong, bad kiwei.
Haba kren sha ki lad pathai khubor hadien ba la kut ka jingïakynduhlang u Bah Roykupar Synrem General Secretary ka HYC u la ong ba kine ki mat ki long ban pynïoh noh ïa ka ILP kaba naduh ki seng bhalang bad ki riewpaidbah nongshong shnong ka jylla ki la angnud la slem slem bha bad ki dawa ba ka sorkar ka dei ban wanrah beit noh ïa kane ka aiñ ban pyrkhing ïa ka jingwanrung ki bar jylla da kaba ka pynbor ïa ka sorkar pdeng ban ai ïa kane ka aiñ kaba ka ïingdorbar ka la mynjur ruh da ka resolution halor kane.
“Ngim tip da kano ka lynti hynrei ka sorkar ka dei ban pynurlong beit noh ïa ka ILP bad ka sorkar jylla ka dei ban pynbor ïa ka sorkar pdeng halor kane,” u la ong.
U la ong ruh ba ka sorkar jylla ka dei ban ïaid shait-shait ïa ka jingpynkynriah ïa kiba shong ba sah ha Them Ïewmawlong bad kam dei shuh ban dang pyslem ïa kane.
“Ha ka por ba mih ka jingïakhih na ka liang ka sorkar ka la thung ïa ka HPC bad ai por tang 6 bnai ba kan phah ïa ka jingai jingmut halor kane, hynrei kat haduh mynta kam pat poi shano shano watla ka 6 bnai ka la kut la slem bha,” u la ong.
U la ïathuh ruh ba ka kynhun ka dawa ba ka sorkar ka dei ban khmih biang ïa ka jingpynbeit pud kaba ki la soi MoU bad ka sorkar Assam namar ka long thurmur kaba wanrah pat ïa ka jingduhnong ïa ka jylla.
Shuh shuh u la ong ba ka kynhun ka dawa ba ka sorkar ka dei ban pynshitom ïa ki pulit kiba donkti ha ka jingsiat ïap ïa u Bah Cheristerfield Thangkhiew ha ka ïing sah jong u bad ong, “hadien ba ka kynhun tohkit ka la dep phah ïa ka kaiphot sha ka sorkar hynrei na ka liang jong ka pat haduh ynta kam shym la shim kino kino ki jingpynshitom ïa kito ki pulit pynïap briew”.
U la ong ruh ba ka sorkar ka dei ban aiti sha ka CBI ban tohkit halor ka jingbamsap ba kynthup ïa ka bamsap ïa u khaw rashon, ka bamsap ha ka jingtei ïa ka assembly, ka bamsap ha ka tnat Social welfare, ka bamsap Smart Meter bad kiwei kiwei ki bamsap ba la paw pyrthei bad ong ruh ba ka dei ban pynshitom ïa kiba donkti ha ka bamsap.
“Ki bun ki jingtohkit kiba ka sorkar ka la thung ki kynhun tohkit hynrei kam ju mih soh eiei, ka shu kut khlem ka jingshah pynshitom ïa kiba don kti ha ka bamsap, namarkata, ngi dawa ba ka sorkar ka dei ban ai jingpynshitom ïa kito ki briew kiba donkti ha ka kam bamsap kat kum ka jinglap ka kynhun tohkit ba ka thung,” u la ong.
Shuh shuh u ong ba ka kynhun ka dawa ba ka sorkar ka dei ban thung kam noh ïa ki samla ha ki sanctioned post kiba thylli da ki bun bun hajar tylli namar kiba bun bah ki khun samla ki shong khlem kam khlem jam bad u la buh jingkylli ruh ïa ka jingbym lah jong ka ban thung briew namar kine ki post ba thylli ki dei kiba ka pisa ka la mang lupa ban siew tulop bad kylli shaei la pyndonkam ïa kata ka pisa.
U la ong ruh ba ka sorkar ba ka sorkar ka dei ban peit biang ïa ka bhah thungkam namar kane kan long ka jingduhnong ïa ka jaidbynriew namar ha ki kyrdan DSC ki kam la mang 80% na bynta kibriew kiba dei na kata ka district.
“Lada phi peit kaei kaba ka Reservation Policy bad ka Roster System ka ong ba ki kam ha ki District level kin dei 80% ïa ki Khasi-Jaintia ne Garo ha ki district ba don tang ma ki. Hynrei lada dei ba ki don lang ki Khasi-Jaintia bad Garo kan long 40 la 40 Percent bad kane hi kan wanrah jingduhnong ïa ka jaidbynriew namar ki Garo ki bun kiba shong ha ki Khasi-Jaintia Hills katba ym don Khasi satia ba shong ha rilum Garo, kata ka mut ki Garo ha ki district ha rilum garo kin ïoh beit kas Reservation 80% katba ngi shane ba don lang bad Khasi bad Garo wat la ka dei ha rilum Khasi ka Reservation na bynta jong ngi kan long 40%,” u la ong.
U la ong ruh ba ka sorkar ka dei ban pyndam noh ïa ka aiñ khalai ym ban shu kren tang ha ki lad pathai khubor kata da kaba wanrah da ka Repealing Act ha ka dur ka Ordinance ne ban khot da ka Dorbar kyrpang halor kane.
Shuh shuh u la ong ba ka kynhun ki san seng ha kine ki sngi ban wan na ka liang jong ki kin pynlong ïa ki jingïakhih halor kane ka mat bad ïathuh ruh ba kin ym ai jingthoh shuh halor kane ka jingdawa jong ki sha ka sorkar namar kam dei shuh ka mat kaba dang thymmai hynrei kaba la slem slem bah.
Haba jubab halor ka jingkren u Myntri ka sorkar BJP u Kiren Rijiju ba ka jylla kan ïoh ILP tang lada ka BJP ka wan ha ka bor, u Bah Roykupar u la ong ba ka BJP ka dei ban ai da ka jingthoh halor kane ym ban shu kren tang ha ki rynsan bad shim, kabu ilekshon ïa kane ka mat jingdawa ka jaidbynriew na bynta ka jingmyntoi saiñ pyrthei jong ki.
U la ïathuh ruh ba na ka liang ka kynhun kin ym sahngeh noh ban ïakhih tang shu treaikam ka MCC hynrei kan bud dien beit ïa kane wat ynda la wan ka sorkar thymmai.