New Delhi, Nohprah 21: Ka Lok Sabha mynta ka sngi, ka la mynjur ïa ki lai tylli ki aiñ kiba ka jingpynbha ne ki amendment jong ka Criminal Law.
Na kine ki lai tylli ki amendment bill kawei ka rai ka long ban pynkylla noh ïa ka Indian Penal Code ne ki CrPC sha ka kyrteng Bharatiya Nyaya Sanhita. Ha kine ki bill la pynrung shuh shuh ïa ki kam sniew kiba dei ban ngat ha ka jingpynshitom bad la nang pynkhlaiñ ne pyneh ruh ïa ka rukom pynshitom. Kawei na kine kadei halor ka jingshah pynïap jongno jongno da kaba shu shah bom shnong ne kata kaba ki ong ka mob lynching. Lyngba kane ka amendment, kino kino kiba donkti ban bom ïap ïano ïano kin ngat da ka jingpynshitom da kaba rai pynïap ne ka death penalty. Kane kan long ruh na ka bynta kito kiba donkti ha kaba leh beiijot ïa ki khynnah rit. Nangta la pynrung ruh hapoh ka aiñ jingpynshitom ïa kino kino kiba donkti ha ki kam tuh wat ha ki kam kiba hapoh 5 hajar tyngka ruh.
Shuh shuh kane ka bill thymmai ka long ruh ba ka kam klim bad ka kam shongkha para shynrang la pyllait noh na kaba pynngat ha ki kam sniew. Kumjuh ruh ka jingthmu ban pynïap hi dalade ïalade la pyllait noh na ki kam sniew.
