Tura, ïaïong, 2: U Myntri Rangbah ka Jylla u Conrad K Sangma ha ka sngi Saitjaiñ u la pynbna ïa ka Pilot Project lyngba ka Payment for Ecosystem Services (PES) Approach ban ïada ka Wah Ganol da kaba mang pisa T. 1.20 klur bad sam ruh ïa ki cheque sha ki kynhun nongrep hapoh ka FOCUS da ka jingsakhi lang jong u Chief Adviser jong u Myntri Rangabh u Thomas A Sangma, u Govt. Chief Whip u Marcuise N Marak, u Principal Secretary jong ka Sorkar Jylla uba dei ruh u CEO jong ka MBDA u P Sampath Kumar, u Deputy Commissioner jong ka West Garo Hills u Ram Singh, u President jong ka Council of Nokmas u Skylance G Momin, ki ophisar na ki tnat treikam bapher bapher, ki Nokma bad ki paidbah nongshong shnong jong ki 20 tylli ki shnong kiba ju ïoh ïa ka umbam umdih na ka Wah Ganol.
U Myntri Rangbah haba pynbna paidbah ïa kane, u la ong, “ngi ïohi ba ka jingpynjot ïa ki khlaw ki btap ka long haduh katta katta bad bun na ki tyllong um ki la sdang ban ring tyrkhong bad ki paidbah ki la jynjar ban ïoh ïa ka um.”
Haba pyntip ba ka jinglong jingman jong ka suiñbneng ka la nang kylla, u la ong, ha kum kane ka khep, ka Sorkar ka la hap ban wanrah ïa ki prokram kiba lah ban weng ïa kine ki jingeh bad dei namarkata ba la pynbna ïa ka Payment for Ecosystem Services (PES) Approach.
“Ha kane ka projek, ka Sorkar kan ym pyntip paidbah shaphang ki polisi bapher bapher hynrei ïa kane ka prokram ka Sorkan kan shu ïarap ban bei pisa khnang ban siew ïa ka bailut baisep lane kino kino ki jingeh ba ki paidbah ki ïakynduh.
U Myntri Rangbah u la pyntip ba ka Sorkar ka la thmu ban pynneh pynsah haduh 4200 square kilometre ki tylong um ha ka jylla baroh kawei bad pyntip ba ka Sorkar kan sa kyrshan jingïarap pisa ïa ki shnong ki thaw lyngba ki tnat treikam bapher bapher.
Na ka iïang jong u Thomas A Sangma, u la ïaroh ïa kane ka sienjam ba la pynbna da u Myntri Rangbah ka ban ïarap ban pyntyllun pura ïa kane ka projek.
Ha kane ka sngi, u Myntri Rangbah u la pyllait paidbah ïa ka Inception Report bad sam ruh ïa ki Cheque sha ki 50 tylli ki Producer Groups lyngba ka FOCUS.
