Nongpoh, Lber 05: Haka jingpyrshang jong ka Ka Dorbar Shnong Mawroh, Nongpoh ban wan rah ïaka khuid ka suba hapoh ka Shnong ka thaw, ki nongialam jong ka Dorbar Shnong Mawroh ki la ïoh ban pdiang ïaka pisa kaba la aiti da u Bah Mayralborn Syiem MLA ka Nongpoh ban kyrshan ïaka dorbar Shnong ha ka ban thied ïa ka kali ka ban kit ïaki ñiut kaba mih napoh ka shnong bad ban leit theh pat sha ki jaka kiba la buh.
Ha kane ka sngi la U MLA ka Nongpoh u la aiti daka song pisa sha ki nongïalam Shnong kum ka jingïarap ïaki ban thied ïaka kali kit ñiut kaba thymmai hakaba u la pynbna ruh ba un dang wat ki lad ban bteng ïaka jingïarap haki sngi ki ban wan.
Ha kane ka sngi la sakhi da ka jingdonlang u MDC ka Nongpoh, Bah Balajied Ranee, Rangbah Shnong Mawroh bah Opel Lyngdoh, ki dkhot jong ka committee Shnong, Seng Longkmie lem bad ki khun Samla jong ka Shnong.
Haba kren ha katei ka sngi naka liang u MLA u la ai ka jingïaroh ïaka Dorbar Shnong Mawroh kaba la shim khia ïaka khuid ka suba kum kawei naki kam ba hakhmat eh ba donkam haka shnong. U la ong ruh, ka jingleh khuid leh suba ka long kawei naki kam kiba ma ngi kum ki nongshong Shnong ngi dei ban pynmlien namar ka jingleh khuid barabor kadei ban sdang shwa na la ïing hynrei ngim dei pat ban klet ba ngi pynkhuid ruh ïaka Shnong ka thaw.
