Da ka pahara shnong miet ai jingmut u Bah Sanbor ba kynrei ki nongdih drok bad ki mentuh

Shillong, Nohprah, 06: Ka jingïalang bad ki Rangbah Shnong bad ki nongïalam Niam kiba hap hapoh ka Municipal Area ba la khot pynlong da MLA jong ka South Shillong Constituency u Bah Sanbor Shullai ha ka sngi Thohdieng ka la rai ban ai jingmut sha ka Sorkar Jylla ban pynlong da ka jingap shnong ha baroh kawei ka sor Shillong manla ka miet kumba la leh da ki Dorbar Shnong ha ki snem kiba mynshwa namar ka jingjyllei shaba palat ki nongtuh nongthiem na ka jingkharoi jong ki nongdih drok kiba la pynshong syier ïa ki shnong ki thaw hapoh kane ka jylla.
Ha ka jingïalang, la ïashim bynta lang da ki ophisar na ka ophis Deputy Commissioner, East Khasi Hills, Superintendent of Police East Khasi Hills, Anti-Infiltration Branch, Anti-Narcotic Task Force (ANTF) bad na ka ophis u Labour Commisisoner.
Haba kren sha ki lad pathai khubor hadien ba la wai ka jingïalang u Bah Sanbor Shullai uba long ruh u Chairman jong ka Meghalaya Tourism Development Corporation (MTDC) u la ïathuh ba ha ka jingïalang la ïatai sani halor ka jingkharoi jong ki nongdih drok, ka jingwan rung be-aiñ ki mynder ri na kiwei pat ki ri shapoh ka jylla Meghalaya, ka jingshah prong tuh ki ing ki sem bad ki jaka mane Blei ba la jia ha kine ki khyndiat taiew bad khyndiat bnai ba la leit noh.
Kane ka dei ka jingïalang kaba ar ba la pynlong tang na ka bynta ki shnong kiba hap hapoh ka Municipal Area hadien ba u la pynlong ïa ka jingïalang kaba nyngkong bad ki shnong kiba hap hapoh ka Cantonment Area shi bnai shiteng mynshwa.
“Nga la ai teng ïa ka kopi jong ka Meghalaya Village Defence Organisation Act, 1966 ban thaw ïa ka Village Defence Party (VDP) ha ki shnong ban khmih da u SP ka East Khasi Hills. Ka por ka la ih ban thaw ïa ka VDP bad ka tnat Labour ka la ai jingmut haba don kano kano ka jingujor bad ka jingsuba ïa kino kino ki nongbylla ba wan nabar ka jylla, ki Dorbar Shnong ki dei ban pyntip sha ka tnat Labour bad sha ka tnat Pulit ban pynlong ïa ka jingtohkit,” u la ong.
“Ngi la ïakren ruh ban pynlong ïa ka jingkhynra kyndit hapdeng ki Dorbar Shnong, ki Seng Kynthei, Seng Samla bad ka tnat Pulit ha ki jaka ba kynjah ba ki briew ki ju mlien ban pynlong ïa ki jaka shongkai ha ka por mynmiet myniong,” la ïathuh u Bah Shullai.
U la ïathuh ba ïa ka rai ba la shim na kane ka jingïalang yn sa phah kopi ruh sha u Myntri Rangbah ka Jylla u Conrad K. Sangma bad sha u Myntri ka tnat Kam Pohiing ka Sorkar Jylla u Bah Prestone Tynsong.
U la kyntu ïa ka Sorkar Jylla lyngba ka Anti Infiltration Branch bad ka Anti-Narcotic Task Force ban pynkhlaiñ ïa ka jingtalasi ïa ki na ki khyrdop rung bad khyrdop mih, kata na rilum Jaiñtia bad na Ribhoi District khnang ban khanglad ïa ka jingrung jong u drok shapoh ka jylla namar kumba la pyntip ba u drok uba la pynrung sha Meghalaya u dei uba wanrah na Manipur, Myanmar lyngba ka surok Silchar sha rilum Jaiñtia bad na surok Byrnihat ne na ka thaiñ Nongstoiñ.
“Shisien ba la pyrkhing ïa ki khyrdop rung bad khyrdop mih, yn sa lah ban tehlakam ïa ka jingwan rung jong u drok,” la pynpaw u Bah Shullai.
Halor ka jingduna ki Rehabilitation Centre ba la pynïaid da ka Sorkar, u Bah Shullai, u la ong, “ha ka jingïalang la pynsngew ïa ka jingduna shaba palat ki Rehabilitation Centre ban sumar ïa ki briew kiba la im kyrni ha ka jingdih drok. Nga ruh nga hap ïarap pisa haba ki don ki longing kiba duk ba kyrduh ki wan pan jingïarap na ka bynta ban phah sumar ïa ki khun kiba la ngop ha u drok.”
“Nga la ai jingmut ïa u Myntri Rangbah ha ka jingïalang jong ka MDA ba la long katto katne bnai ban wad jaka ha Mawdiangdiang na ka bynta ban shna ïa ka Rehabilitation Centre bad kumjuh ruh ba ki District Social Welfare ruh kin wad jaka ban shna ïa ki Rehabilitation Centre. Ynda la ïoh jaka, ngin sa pynkhreh ïa ka Detailed Project Report (DPR), ban leit pynsngew sha u Myntri Rangbahduh ka ri u Narendra Modi, ha u Myntri ka tnat Kam Pohing u Amit Shah bad u Myntri ka tnat Social Welfare ban mang pisa ban pyntyllun ïa ka kam shakhmat,” la ïathuh u Bah Shullai.
Ha ka jingïalang la ai jingmut ban pyndait ïa ki CCTV Camera ha manla ki shnong.
U la kyrpad ïa ka Sorkar Jylla ba kan bthah ïa ka tnat Pulit ba kan pynjur ïa ka jingïaid pahara khamtam ha ka por mynmiet mynïong khnang ban khanglad ïa ka jingjyllei ki kam tuh kam thiem.