Da ka nam rem baroh lai sien pynkut ka Rangdajied ïa ka Durand Cup 2024

Shillong,Nailar 13 : Ka kynhun ïalehkai jong ka Tribhuvan Army FC jong ka Nepal, ka la ïoh ban thep haduh 2-0 ha ka jingïalehkai kaba lai bad kaba khatduh jong ka 133rd IndianOil Durand Cup kaba long ha ka janmiet sngi Ba-ar ha madan JN Stadium, Polo ha ka jingïalehkai kaba itynnad bha.

Kumba ka long haduh mynta hi, katei ka kynhun na Nepal ka don mynta ha ka kyrdan kaba lain a ka Group, kata hadien ka Shillong Lajong bad ka FC Goa kiba don ha khlieh jong ka miej kheiñ point. Katba ka Rangdajied pat kaba mad ïa ka nam rem baroh lai sien, ka don sha trai duh jong ka miej kheiñ point. Lah ban kdew hangne ba ka jingrung jong ka Rangdajied United FC ha ka minit kaba khatduh jong ka Durand Cup kadei hadien ba ka Hyderabad FC ka la weng noh ïalade na katei ka lympung ïalehkai kaba heh.

Haba phai sha ka jingïakhun, ïa ki kol jong ka Nepal ha kane ka sngi la ïoh ban thep da u Gillespye Karki ha ka minit kaba 21 jong ka kylla step bad ïa kawei pat ka kol u la ïoh ban thep ha ka minit kaba 57 jong ka kylla miet lyngba ka Penalty.

Na ka liang u Coach ka Rangdajied ha kane ka sngi u la sei da ka kynhun kaba thymmai na kaba mih madan ha ka jingïakhun pyrshah ïa ka Shillong Lajong.

Ha ka jingïakhun kaba shongshit bha, dei ka Rangdajied kaba ïoh ban pynsyier that that ia ka Nepal Army ha ka kylla step. Hynrei ka jingïoh jong u Gillespye ha ka minit kaba 21 ka la pynkyndit lut ïa ka kynhun baroh kawei. La katta ruh ka Rangdajied ka dang iakhun tyngeh ban ïoh pynphai noh ïa katei ka shi kol hynrei kane ka jingpyrshang kam shym la urlong wat hadien ba la kut ka kylla step ruh.

Ka jingïalehkai ka la nang shongshit shuh shuh ha ka kylla miet hadien ba baroh arliang ki ïakhun tyngeh ban ïoh thep kol pynban ha ka por bym poi pyrkhat ka Nepal Army ka ïoh biang sa kawei pat ka kabu ksiar ha ka minit kaba 57 lyngba ka penalty ha kaba u Gillespy khlem jingbakla u la ïoh ban pynkhih jar bad pyntikna ba ka kynhun kan ïoh lamkhmat da 2-0 kol tad haduh ban da kut ka por ïalehkai.

Ka jingïakhun kaba khatduh na ka Group kan long ha kane ka sngi Saitjaiñ hapdeng ka Shillong Lajong bad ka FC Goa. Kane ka jingïakhun kan rai ruh mano ban ïoh knieh ïa ka kyrdan kaba nyngkong na ka Group.