Shillong, Jylliew 19 : Lada ki paidbah ka Jylla ki ïohi ia ka jingpluh khlaw, wat sheptieng kulmar hynrei dei ban pyntip ïa ka jingjia lyngba ka phone.
\ Ka Tnad Forest ka Jylla kala pyntreikam mynta ïa ka Mobile Application- The Meghalaya Forest Fire Information System (MeFFIS), ba lah ban download na ka Google Play Store jong ka phone, khnang ba ki paidbah kin lah ban thep ïa kino kino ki jingtip kiba ïadei bad ki kam pluh khlaw ha Jylla.
Kane ka long kaba kongsan namar kumba 49% na ki khlaw ba don ha Jylla, ki dei kiba ap jingma na ka jingpluh. Kane ka jingkheiñ ka dei kaba heh ban ïa ka jingkheiñ jong ka Forest Survey of India da 10%.
Kat kum ka jinglum jingkheiñ ïa ki khlaw ba don jingma ha Meghalaya ka pyni ba ha Ri-Bhoi District ka dei kaba bun eh ka jaka ba lah ban kem ding kata haduh 50% (1068.72 sqkm) jong ki khlaw ba don ha ka District.
Napdeng ki Block, ka Rongjeng Block ha East Garo Hills ka kot sha ka 74.3% naka jingdon ki khlaw ba ap jingma, ka West Khasi Hills District ka dei kaba don bun eh ki khlaw bala pluh (palat ïa ka 100km) ha baroh kine ki snem, ka Mawshynrut ha West Khasi Hills ka dei kaba Block ba shah ktah jur eh ha Jylla ha ka jingdon ki khlaw kiba pluh.
Ka jingpluh khlaw ka dei kawei na ki jingma ba khraw eh ïa ka spah mariang bad ki jingthaw ba im, hapoh ka Jylla. Bun bah ki khlaw kila pluh manla u snem namar ka jingkem ding. Namar kata, la shna mynta ïa ka Meghalaya Forest Fire Information System (MEFFIS) kum ka lynti ban ïoh jingtip na ka bynta ki nongshim rai ba kin peitthuh bad kheiñ jingkheiñ hapoh ka por kaba biang ïa ka jingpluh ki khlaw bad kiwei kiwei.
U Myntri Rangbah ka Jylla Conrad K Sangma ula pynpaw ba haduh 36% ki jaka khlaw ka Jylla, ki dei kiba don jingma bha na ka jingpluh, kaba thew shai ïa ka jingdonkam ïa ki jingkheiñ jingdiah ki ban btin lynti ha ka jingtem ïa ki jingpluh khlaw.
Ka App ka shah ruh ban shon dur ïa ki jingpluh khlaw ba jia ha kano kano ka jaka ha Meghalaya.
