Da ka Mini Hospital ba 6 klur duna wanrah u Bah Sanbor ha Lumparing, 2 tylli ki surok ba 3.58 klur

Shillong, Nohprah 14 : Ban pynsuk ïa ki nongshong shnong ka thain Lumparing ha ka pang ka shitom na ka liang u MLA ka Shillong South Bah Sanbor Shullai ha ka sngi Thohdieng u la leit ban jurip ïa ka jingpyntrei ïa ka Mini Hospital ha Lumparing ïa kaba la tei ha ka jinglut kaba 6 klur duna.
Ha kane ka jingjurip la donlang ruh ki Director na ka tnad ka Koit ka Khiah kumjuh ki ophisar na ka tnad PWD nalor ki nongïalam shnong bad kiwei kiwei.
Katkum ka jingïathuh jong u Bah Sanbor, ïa kane ka hospital ba 10 jingthiah la buh thong ban pyndep noh la kumno kumno ha u Nailur jong u snem ban wan.
“Ynda la dep kane ka mini hospital, ki paidbah haba pang ba shitom kim donkam shuh ban leit shaduh Civil Hospital ne Ganesh Das Hospital kaba jngai haduh 10 kilometer ei ei hynrei da kaba suk ki la ïoh ïa ka jingsumar ha la shnong bad ha ka thain la jong,” u la ong.
Ha kajuh ka por u la pyntip ruh ba ka sorkar jylla ka la mang ruh kumba 50 lak tyngka na bynta ban pynbha bad maramot thymmai ïa ka Laban State Dispensary kaba la don naduh ka por jong ki phareng.
Ha kane kajuh ka sngi u Bah Sanbor ryngkat ki ophisar ka tnad PWD ki la leit ruh ban jurip ïa ki surok kiba la shna ha ka jaka kaba ym poi pyrkhat ban poi surok ïa kiba la nang ha ka jinglut ba 3.58 klur tyngka.
Kine ki surok ki kynthup ïa ka surok na Jingkieng Kong Nora Hynñiewta bad Bah Ekindro Diengdoh haduh ka surok PWD ha Dhobi Ghat. Bad kawei pat kadei kaba shna ïa ka surok na jrong ka Kshaid na jan Ïing i (L) Kong Q Kharwanlang shaduh ka jingkieng PWD ha Lower Lumparing.
“Nga pynpaw ka jingsngewnguh ïa u Myntri Rangbah ka Jylla, Conrad K Sangma bad ïa ki Myntri ba peit ïa ka tnad PWD bad ka tnad ka Koit ka Khiah kiba la pynstet ban ai jingmynjur na bynta kine ki kam pynroi kiba ïadei bad ka Shillong South khamtam na bynta kane ka mini hospital bad kine ki surok,” ong u Bah Sanbor.
Shwa kane, u Bah Sanbor u la ïathuh ruh ba kitei ki surok kiba ki jurip ha kane ka sngi ki dei kiba jynjar bha ha ka leit ka wan bad ym ju don ba poi pyrkhat ba ha kawei ka sngi yn sa lah ban pom surok.