Nongpoh, Lber 08: Daka jingthmu ban pynsuk ïa ki paidbah, ka bor synshar District ka Ri Bhoi ka la pyntreikam ïa ka miej ïarap ne ka Help Desk hapoh ka ophis treikam jong u Deputy Commissioner ka Ri-Bhoi ryngkat u nombar ai jingïarap ba kyrpang ban pynsuk ïa ki paidbah ban buh ki jingkylli, bad buddien ïaki kam jong ki bad jingujor halor ki kam bad ki jingshakri bapher bapher ba la pyntreikam da katei ka ophis sorkar.
U number 8131811911 un treikam lyngba ka phone bad WhatsApp naduh ka 10 tarik Lber 2025 naduh ka por 10 baje mynstep haduh 5 baje janmiet haki sngi longtrei ban ïarap ïaki paidbah ban ïoh jingtip ha kaba ïadei bad ki jingtreikam jong katei ka ophis, ban buddien ïaki kam ki jam ki kot ki sla ba donkam, ki skhim sorkar, ki jingtip halor ka jingdon jong ki nongtrei ne ophisar ha ka ophis jong u Deputy Commissioner bad kiwei kiwei ki ophis.
Ïa kane ka Help Desk ryngkat u Helpline Number la plie da u Deputy Commissioner ka Ri Bhoi, u Abhilash Baranwal ryngkat ka jingdon lang ka Additional Deputy Commissioner ka Ri Bhoi, ka Kong Balakyntiew Rani lem bad ka jingsakhi ki nongtrei sorkar ha katei ka ophis.
Naka liang u DC ka Ri-Bhoi u Abhilash Baranwal ryngkat ka kong B Ranee ADC ka Ri-Bhoi kila ong ba kane kan ïarap ïaki paidbah khamtam ki paidbah kiba sah kham jngai ba kim donkam ban wanmih sha ophis u DC bad ban pynlut ka ka bai kali, ka nongsngi naka bynta ban buddien ïaki kam ki jam jong ki, hynrei ban shu phone ne WhatsApp ha utei u number.
