Shillong, Lber 26 : Ka Khasi Hills Autonomous District Council (KHADC) ha ka sngi Balang ka la wanrah ïa ka Mangtyngka kaba 35.44 klur tyngka na ka bynta ka samoi treikam kaba lai bnai kaban sdang naduh ka 01tarik Ïaiong 2025 haduh ka 30tarik u Jylliew 2025.
Ïa kane ka Mangtyngka la wanrah da u Executive Member ka tnad Finance, Bah Seiborlang Warbah ha ka sngi sdang jong ka Dorbar Mangtyngka hynne ka sngi Balang.
Nalorkata, u la ïathuh ruh ba ïa ka mangtyngka kaba pura kin sa lah pat ban rah ha ka sien shong Dorbar kaban sa long biang jong ka Council.
Nangta, u ong ruh ba kane ka Mangtyngka kan ailad ïa ki tnad ba pher bapher ba kin lah ban pynïaid beit ïa ki kam bapher bapher tad haduh ka 30tarik u Jylliew mynta u snem.
Katkum ka jingong jong u, kane ka mangtyngka kaba lai bnai ka dei eh ruh na bynta ka tulop jong ki dkhot ka council, ki nongtrei jong ki tnad bapher bapher la ka long ha ka Executive, Legislative bad ruh ha ka Judical nalor kiba ïoh ïa ka penshon.
Na kane ka 35,44,55,600 tyngka, haduh 8,52,29,550 tyngka la mang na bynta ka General Administration Department, 17,65,910 tyngka na bynta ka Law Department, 2,65,38,350 tyngka ïa ka Revenue Budget & Finance Department, 2,57,05,470 – Forest Department, 1,70,52,930 – Administration of Justice & Judicial Department, 2,27,65,040 – Legislative Department, 3,87,640 – Education Department, 15,82,93,940 – Civil Works & Development Department bad 1,67,16,770 – Enforcement Scheme for protection of Tribal Land & Interest.
