Shillong, Naitung 29 : U Myntri Rangbah ka Jylla Conrad K Sangma ha ka sngi Balang u la sam ïa khusnam “Achiever of the Month” hapoh ka Chief Minister’s Meghalaya Grassroot Music Programme (CM-MGMP) ba long ha Tura.
Haba ai jingkren ha ka jingïalang ba ïashimbynta da ki nongput nongtem, ki nongseng kam bad ki samla, u Myntri Rangbah ula ong ba ka jingpynlong ïa ki prokram ka Sorkar ha kylleng ki jaka ka ïarap ban ïasam jingtip halor ka kolshor bad ki jingshem kawei ka jaka sha kawei pat.
U la pynbna ba manla u bnai ka Sorkar kan ithuh bad pynkup burom ïa ki nongtreikam bha ha ki jait kam bapher bapher, kum ha ka put ka tem/kaitor, ki nongïalehkai, bad kiwei kiwei, khnang ban lah sei ïa ki riew don sap kiba tbit.
“Ngi la sdang ïa kane ka prokram ha u snem 2018 ban kyntiew ïa ka sengkam sengjam. Mynta ngin pynïar ïa ka jingtrei kam sha kiwei pat ki jait kam. Manla u bnai ngin sa jied ïa ki Tnad bad ithuh ïaki nongtreikam bha hapoh ka kyrdan u Myntri Rangbah. Mynta u bnai ka dei ïa ka put ka tem, lashem bnai kan long ïa ka kam ïalehkai” ula ong.
U Myntri Rangbah ula ong ba kane ka jingïathuh ka dei kaba la leh da ka jingthmu ym tang ban lehkmen ïa ka jingjop jong ki riew shimet hynrei ban kyntiew ïa kane ka kam baroh kawei bad ban ai mynsiem ïa kiwei pat. Ula ai ïa ka nuksa ba dang shen ïa ki nongsengkam ka Jylla kiba la pynmih ïa ki tiar kilan met bad uwei pat uba tei ïa ka recycling business ba T.60 lak.
Haba shim ïa ka put ka tem kum shibynta jong ka jingithuh ba kyrpang ka Meghalaya, u Conrad ula ong ba ka Jylla kala ïoh ïa ka jingithuh ha ka pyrthei ïa ka jingdon ki kaitor bad nongput nongtem ba don sap, hynrei ka jingkyrshan ka Sorkar ka dei kaba dang sah shadien.
“Mynta ka sngi, ka MGMP ka kyrshan ïa ki hajar ngut ki kaitor/nongput nongtem. Watla kane kam pat biang satia, ngi la ïaid pat ha ka lynti kaba dei” ula ong.
Haba pyntip ïa ki thong ka Sorkar ha kane ka kam, u Conrad ula kyntu ïa ki nongput nongtem bad kaitor ba kin pynmih ïa la ki jong ki jingrwai ha ka jaka ban shaniah na ki jingrwai pateng.
“Ki jingrwai lajong kin ai ka jingithuh ïa phi. Ngi donkam ban thaw ïa ki jingrwai bad jingput jingtem kiba lah ban ïasam ha ki rynsan ka pyrthei” ula ong haba bynrap ba ki tamasa kiba heh kum ka Cherry Blosson kan buh ïa ki jaka ba kyrpang na ka bynta ki nongrwai kiba rwai ïa la ki jong ki jingrwai.
U Myntri Rangbah ula pynbna ruh ïa bun ki project jingtei kiba la pynwandur ban buh ïa ka Meghalaya kum ka jaka pdeng jong kiei kiei baroh, kynthup ka madan ïaput ïatem ba ngiam 40,000-50,000ki briew ka ban mih ha Knowledge City ha Mawkynrew, ka Music Institute ha Tura, ka Film City bad Film Institute ha Shillong.
Hadien kane, u Conrad ula ïakren bad ki nongput nongtem na kylleng ka Jylla Meghalaya bad sngap ïa ki jingeh bad ki jingai jigmut jong ki kum shibynta ban tei ïa ka kam put kam tem kaba khlain bad kaba neh.
Mynta u bnai, ka Achiever of the Month Award ka CM-MGMP ka leit sha u Chegim Durama, u kaitor ba 25 snem na Tura, uba la sdang ban thaw ïa ki lad ban pynmih jingrwai ha ka rta ba 13 snem bad pynmih pat ïa ka jingrwai ba nyngkong jong u ha ka rta ba 21 snem.
