Khliehriat, Risaw, 22: Ka Khasi Stidents Union Narpuh Circle kan pynlong ïa ka jing pynkup burom ïa kito ki samla pule jong ka thaiñ Narpuh kiba la pass bha shakhmat ha ki kyrdan pule bapher bapher, kiba poi ha ka kyrdan 1st Division bad kane ka khusnam ka dei ka “12th Mait Shaphrang Academic Award 2023”
Ïa katei ka khusnam ka seng kan ai ïa kito kiba pass ha ka 1st Division ha ka jingiakhun exam jong ki ha ka kyrdan SSLC, HSSLC, Degree, Master Degree, ICSE, CBSE bad kiba pass ia ki jingpule (line) bapher bapher mynta u snem 2023 bad ïa kane ka khusnam yn sam ha ka 31 tarik mynta u bnai risaw 2023 kaba yn pynlong ha skul Divine Word School ,Lumshnong ha ka por 12 baje mynsngi, ka seng ka pynbna ba kito kiba la dep ban aplai ïa kane ka khusnam kin sngewbha ban wan mih ha katei ka sngi ha katei ka jaka ha Lumshnong.
Shuh shuh ruh, ha katei kajuh hi ka sngi ka seng kan pynkup burom ruh da kaba ai da ki momento ïa kito ki khynnah school kiba wan ha ka kyrdan ba nyngkong, ba ar bad ba lai ha ka jingiakop thoh Slogan (Slogan Writing) ha ka jingiakop dro dur kaba ka seng ka la dep ban pynlong naduh ka ka 5 tarik u jylliew 2023 kaba dei ka sngi kyrpang ba ju tip kum ka Sngi Pynneh mariang lane ka World Environment Day.
Kumta la bthah ïa baroh ia kito ki khynnah skul kiba la ïa shim bynta ha katei ka jingiakop dro dur ba kin sngewbha ban wan mih ban shim ïa ka khusnam jong ki ha katei ka sngi ha Lumshnong, kane ka long katkum u kyrwoh ba la phah da u Education Secretary KSU Narpuh Circle, u samla Chanmi Syrti.
