Shillong, Risaw 30 : U National President jong ka National People’s Party (NPP) ba dei ruh u Myntri Rangbah ka Jylla, Conrad K Sangma u la kren da ka ktien Khasi ha ka jingïalang ha Jongksha ban pynbna ïa u Bah Kansing Lyngshiang kum u kyrtong ka partyn a Mawkynrew ha kane ka elekshon MLA kaban long ha u 2023.
“Sngewbha ai ka jingkyrshan ba pura bad ban pynjop donburom ïa u (Bah Kansing) ha kane ka elekshon ha u snem 2023,” kren u Conrad ha ka ktien Khasi ha katei ka jingïalang kaba la poi da ki hajar ngut ki nongshong shnong ka Mawkynrew constituency.
Nalorkata, u ong ruh ba da ka jingwan pynïasoh jong u Bah Kansing kan long ka jingkyrkhu ïa ka thaiñ Mawkynrew baroh kawei. U ong ruh ba kane ka elekshon 2023 kan dei ka elekshon kaba kongsan tam ha ka jylla Meghalaya namar u don ka jingkyrmen ba ka NPP kan ïoh ban jop hi marwei ban synshar ïa ka jylla.
“Ngin sa lah ban thaw hi ïa ka sorkar bad ngin sa trei bad bteng ïa ka kam kaba ngi la sdang bad ïalam ïa ka jylla shaphrang ha ki liang baroh bad ngin weng lut ïa baroh ki jingeh ba ka jylla ka kynduh ha kine ki 50 snem,” u la ong.
Da kaba kam ba kane ka sorkar ka la sdang ban trei ha baroh ki liang hynrei ki dang don shibun kiei kiei kiba hap ban pyndep. U Conrad u la ong ruh ba ka jingkyrshan kaba ki paidbah ki ai ki don ka jingsngew-skhem ba ha ka elekshon ban wan kin sa wan phai biang ha ka rukom kaba kham khlaiñ.
U Bah Kansing haba kren ha ka jingïalang u la pynshai ruh ba ka jingmih noh jong u na ka Congress kam dei satia na kino kino ki daw hynrei kadei beit namar u kwah ban ai ka jingshakri kaba kham paka ïa u paidbah.
“Nga hap ban ïakhun pyrshah ïa u Myntri ka sorkar jylla ha kane ka elekshon 2023 kumta nga hap ban don bad ka party kaba kham biang ba ngan poi sha ka thong,” u la ong da kaba kyntu artad ïa ki paidbah ba kin ailad noh mynta ka kynti ïa u trai shnong trai jaka ban ïalam kum u nongmihkhmat ka thaiñ.
