Jowai, Naitung 01: Uwei u briew uba dei na ka shnong Lapangap West Jaiñtia Hills District ula shah siat da ki jri siat sim ha ki briew Karbi na ka shnong Lakaroi bad une u briew ula mynsaw jur ha ki bynta jong ka dur khmat.
Katkum ka video bala phah utei u briew ba shah siat ula ïathuh mynta ka sngi katba u dang leit shim dawai niangsohpet na ka shnong Lumlakhiat, hynrei ha ka por ba u wan phai noh sha ïing ki la don ki briew kiba la ap lypa ha ki bynta jong katei ka shnong bad ki la siat ïa u da ki jri siat sim haduh ba ula mynsaw jur.
Related Posts
Shuh shuh ula ïathuh haba u phaikhmat sha ka jaka ba siat ïa u, la ïohi pynban ba ki don kumba 50 ngut eiei ki briew jong ka Karbi, wat hapdeng ka jingmynsaw bad ka jingmih snam ula phet rieh mar mar na katei ka jaka da kaba ñiah da ka bicycle jong u, na ka liang ki briew jong ka shnong Lapangap hapoh ka jingïalam u Waheh Shnong ki la leit rah noh ïa u sha Namdong CHC ban ïoh ka jingsumar.
Halor kane ka jingshah siat ki nongïalam shnong ka Lapangap ki la pynrem jur ïa kane ka jingleh dusmon jong ki pait Karbi (Assam), na ka liang u Waheh Shnong ma Deimonmi Lyngdoh ula pynpaw ka jingsngewsih halor kane ka jingjia ïa ki briew ka shnong, da kaba u kyntu jur ïa ka sorkar ban kan pynkloi ban pynpoi noh ïa ki pulit hapoh ka shnong Lapangap, khnang ban lait na kino kino ki jingjia ba sngewsih.
Na ka liang ki kynhun sengbhalang ruh ki la pyrshah jur ïa kane ka jingleh ki Karbi ka la lah ruh ban wanrah ïa ka jingïakynad na ka por sha ka por.