Da ka jingtohkit ba laitluid ban lap ïa ki jingshisha, ong u Lamphang

Shillong, Jymmang 23 : U Lamphang ka ïing Dorbar Thawaiñ Assembly jongka jylla u bah Metbah Lyngdoh u la ong ba yn thung da ka Kynhun Tohkit ba Laitluid ban tohkit halor ka jingtwa ne khyllem noh jongka Dome kaba tei halor tnum ka Central Wing ne bynta pdeng jong ka ïing Dorbar ba thymmai ha Mawdiangdiang kaba la jia ha ka step synñia jongka Sngi U Blei ha ka por 12.30 A.M. Nalor kane u la ong ruh ban thung da ka Third Party Audit ban peit thuh la ki ar tylli ki shnat jong ka jingtei kaba sha ka diang bad ka mon kane ka bynta pdeng ki don ne em ka jingshah ktah na ka jingtwa ne khyllem jong kane ka Dome.
Haba ïakren bad ki nongthoh khubor, u la ong,“ Ka long kaei kaei kaba nga kwah ban pynpaw ïa ka jingsngewsih kaba khraw halor ka jingtei ïa kane ka ïing Dorbar Assembly ba thymmai ha Mawdiangdiang da ka jingtwa jong kane ka Dome kaba la tei ha ka bynta pdeng jongka ïing dorbar kaba la hap noh ha ka Sngi U Blei 12.30 baje mynstep. Ka jingjia ka long kaba pynlyngngoh haduh katta katta namar hadien ba la ïoh jingtip halor kane ka jingtwa jongka Dome bad ka jingjulor ka long kaba jur , mar mar nga la phone sha ki engineer bad ki ophisar jongka PWD ( Building) kiba dei peit bad dei ban jngoh ïaka jingtei ïa katei ka Assembly. Mynne hi ki la leit jngoh ïa katei ka jaka bad nga la pyntip ïa u Consultant bad Contractor halor kine kiei kiei bad namar ka jingbym lah ban poi u consultant ha ka por ba biang ba slem ka eroplane na Delhi kumta la leit jngoh shwa tang ki ophisar. Tangba kim pat lah ban lap ïa kano kano ka daw jongka jingtwa kane ka Dome”ong u Lamphang.
Shuh shuh u la ong “ Lashai mynstep ha ka por 11 baje ma nga, u Myntri Rangbah, ki dkhot jongka High Power Committee (HPC) jong kane ka jingtei kaba la sdang naduh kato ka por jong i Lamphang ba rim, ki Engineer, u Consultant ba dei peit ïa ka design bad kontraktor ngin leit jngoh ïa katei ka jingtwa, jingjot bad jinglong .Ki don ar tylli kiei kiei, kawei ka lah ban don ka jingbakla na ka liang kaba design ïa ka jingtei bad kawei ka lah ban don ka jingduna na ka liang u kontraktor ha kaba ïadei bad ka jingpyntrei ïa ka kam. Te ha kaba design lada don ka jingduna hangta ma u u hap ban kitkhlieh, lada dei na ka liang ka jingtrei pat naduh u kontraktor bad kiba peit ïa ka jingtrei kata ki engineer ki hap ban shim ka jingkit khlieh. Na ka liang jongnga ka sngew ban ong ba wat la ka HPC kam pat shong ruh kan dang shong lashai nga sngew ba donkam ban wad ïa ka tyllong jongka daw ne ban tohkit bniah ban lap mano ha hap ban shim ka jingkit khlieh halor kane ka jingtwa jong kane ka Dome”.
“ Kaba ar pat ka long hadien ba ngi la dep tohkit bad ban bteng ïa ka jingshna ne tei pat ïa kane ka ïing paki, dei ban don ka Third Party Audit ka ban bishar bniah ha kaba ïadei bad ki jingtei ba la dep tei kiba khlem jot kata sha ka liang ka diang bad sha ka liang ka mon jong kane ka bynta pdeng ba jia ka jingtwa ban pynthikna la ki don jingshah ktah ne em. Hadien kata ngin sa pyrkhat kaei kaba ngin ïaid shakhmat. Ka daw ba ong ba lah ban don ka jingbakla ha kaba design ne ha ka jingpyntrei u kontraktor ka dei namar ba ym don kano kano ka jingshah ktah na ki bor mariang ne ym don jingkhynñiuh jumai hi ruh. Namar ka rukom saiñdur ïa ka jingtei ka long kaba paka bad skhem bha kaba lah ban ïada ïa u jumai uba jur ruh” ong u Lamphang.
ïa kane ka kam la peit lut nadong shadong da ka PWD ( Building) naduh kaba pyntrei haduh ki jinglut jingsep la peit beit da katei ka tnad. Kaei kaba u Lamphang u leh ka long ban bud dien ba ka jingtrei ka dei ban ïaid beit khnang ba yn lah ban pyndep ha ka por kaba biang ne ka por ba la buh.
Halor ka jingkylli balei ba la ai sub contract sha ka kompani kaba la shah kyntait ha kaba sdang, u Lamphang u la ong ba kane ka shong beit ha ka PWD Building. Da kane ka jingjia ka jingpyntrei ïa ka Assembly ruh kan shim por shuh shuh bad ka jingbuh por ban pyndep hapoh une u snem ruh ka la buh ha ka jingartatien.
Tangba kawei pat ka long ba ka sorkar ka dei ban pynsaja bad pynshitom ïa kino kino kiba leh torti ne trei tang dep bad kheiñ sting ïa ka kam hadien ka jingtohkit. Halor ka jingkylli hato ka dei kumba la ong ba ka don ka jingban khia ba dei ban pyndep sted ïa ka kam u Lamphang u ong ba ym ju don ba wan ïathuh ne ud bad ïa kane u tip bha u Executive Engineer namar u khlem pyntip sha ka HPC ne wat sha u kum u Lamphang ruh.
U Lamphang u ong ruh ba ïa ka Third Party Audit dei ban leh da ka IIT na kiwei ki jaka ym shuh na ka Rorkee.