Nongpoh, Jylliew 08: Ka Balang Presbyterian Umdihar ba hap ha ka Ri Bhoi Sepngi Presbytery ka Ri Bhoi Presbyterian Synod kumba ka la sdang ban rakhe ïa ka Diamond Jubilee naduh ka 2 tarik u Jylliew 2025 da ki prorkam bapher bapher bad mynta ka sngi u Blei ka la lah ban pynhap pyrda noh ïa kane ka jingrakhe ïa ka Diamond Jubilee da ki jingïaseng kyrpang naduh ka por mynstep bad haduh ka noh phai sngi lyngba ka jingïaseng kyrpang bad ki prokra bapher bapher.
Kum ban pynkynmaw, ïa ka Balang Presbyterian Umdihar la seng ha ka 6 tarik u Jylliew 1965 bad kane ka jingrakhe ïa ka Diamond Jubilee ka dei ka jingkyrtiang dien biang ïa ki 60 tylli ki snem ba kane ka Balang ka la ïaid lynti, ha kaba wat la shibun ki jingeh bad ki jingtynjuh ba la ïa kynduh bad kane ka Balang ka la lah ban rakhe ïa kane ka Diamond Jubilee ban ai ka burom sha U Blei Nongbuh Nongthaw uba la ri la sumar ha ka jingïaid lynti kaba 60 tylli ki snem.
Haba rakhe ïa kane ka Diamond Jubilee, ka Balang Presbyterian Umdihar, ka la buh ïa ka phang kaba kyrpang da kaba sot na ka ktien ka jong u Blei, “ Haduh Katne U Trai U la ïarap ïangi” na ka Kitab 1 Samuel 7:12.
Ha kaba pynkut ne pynhap pyrda noh ïa kane ka jingrakhe ïa ka Diamond Jubilee, la ai mynsiem ruh ïa ki paid riewngeit ka Balang Presbyterian Umdihar, da ka jingshim bynta u MP ka Shillong, u Dr. Ricky A.J Syngkon ban sam ïa ka ktien ka jong u Blei ha ka jingïaseng mynstep bad ha ka jingïaseng noh phai sngi pat la pharia ne sam ïa ka ktien ka jong u Blei da u Rev. H.K Nongbsap.
Kum ki shakri jong u Blei, naduh u Dr. Ricky A.J Syngkon, MP ka Shillong bad u Rev. H.K Nongbsap kum u nongsharai ha ka Balang Presbyterian, haba sam ïa ka ktien ka jong u Blei ki la ai khublei kyrpang ïa ka Balang Presbyterian Umdihar bad ruh ïa ki paid riewngeit, kiba la lah ban kynjoh sha kane ka jingïaid lynti kaba 60 snem ban ieng skhem hapoh ka Balang na ka bynta ban dang pynkhlaiñ ïa ka jingim ba kynja mynsiem bad ruh na ka bynta ka bha ka miat jong ka imlang ka sahlang lyngba ka jingdon jong kane ka Balang kaba long ka ïingkyntang ban saiñdur ïa ka jingim ba kynja mynsiem.
Ki la ai ruh ïa ka jingkitbok kitrwiang ïa ka Balang Presbyterian Umdihar ba kin dang shyrhem ha ka jingim ba kynja mynsiem bad ban dang pynkhlaiñ ïa ka jingngeit ha kaba lyngba ka jingdon kane ka Balang kan long ka jingkyrkhu ïa ki paid riewngeit hi baroh kawei la ka long ha ka jingim ba kynmynsiem ne ha ka jingim ba man la ka sngi ha ka imlang ka sahlang.
Haba pynkut ne pynhap pyrda ïa kane ka jingrakhe ïa ka Diamond Jubilee ka Balang Presbyterian Umdihar, nalor ka jingïaseng kyrpang naduh mynstep bad haduh ka noh phai sngi bad la pynphuh pynphieng bad pynshongkun ruh da ka jingrwai Choir ba la shim bynta naduh Choir ka Balang Presbyterian Umdihar, Balang Umtasor Nongrim Jyrmi, Junior C.E Society Balang Presbyterian Umdihar bad ka na ka Jingïaseng Kynthei ka Balang Presbyterian Umdihar.
