Da ka jingshai U Khrist to ngin wanrah jingshai ïa kiba don hapdeng ka jingdum: Bishop Ferdinand

Jowai, K’Lyngkot 06: Hadien khyndai snem ba plie ïa ka St. Joseph Parish Mynsngat, ka la ïoh ban pynmih ïa u Lyngdohniam jong ka Balang, u Lyngdohniam, u Baiming Pale na ka shnong Ionglywit, Elaka Nongjngi, West Jaiñtia Hills District bad la pynkyntang Lyngdohniam ïa u ha kane ka 5 tarik Kyllalyngkot 2025, ha Mini Stadium ka shnong Ionglywit da u Most Rev. Ferdinand Dkhar d.d. ka Jyllaniam Jowai. Ha kane ka jingpynkyntang Lyngdohniam nalor ki Lyngdoh, ki ‘riewniam da ki hajar ngut ki khun ka Bri U Hynñiewtrep ki la iatuid sha Mini-Stadium Jrikhla ban sakhi ïa kane ka jingpynkyntang Lyngdohniam ïa u Baiming Pale.
Ha ka por 10:00 AM la don ka jingkñia Mas Iukharist kaba iphuh iphieng kaba la lamkhmat da u Bishop Ferdinand Dkhar ha ryngkat ki Lyngdohsohblei bad ka jingpynkyntang Lyngdohniam ïa u Dn Baiming Pale bad u long u Lyngdohniam uba nyngkong eh ba ka St. Joseeph Parish Mynsngat ka la pynmih bad ka ktien im sngi jong u (Motto) kum u Lyngdohniam u la shim na ki kyntien ka jingthoh bakhuid “U la khot ïa nga da ka jingaiei jong u” (Kalatia. 1:15).
U Bishop Ferdinand haba kren ha kane ka sngi u la shim lai tylli ki Mat. (1) Uei u Lyngdohniam Katholik (2) ka jingpynkhreh ïaka Jubili ba khraw 2025 snem ka jingwan U Jisu Khrist, U Nongpynim sha kane ka pyrthei bad kaba (3) da ka jingshai U Khrist to ngin wanrah jingshai ïa kito kiba don hapdeng ka jingdum.
U Bishop Ferdinand haba kren shaphang u Lyngdohniam Katholik u ong “Ia u Lyngdohniam Katholik la jied na pdeng ki briew, la thung ban long u Nongmihkhmat ki briew ha khmat U Blei, ban tyrwa ïa ki jynai bad ka jingkñia na ka bynta ki Pop. ïa u Lyngdohniam Katholik ym shym la thung ne jied da ki riewpaidbah jong ka shnong ne jong ka ri, hynrei la jied ïa u da ka jingaiei U Blei kumba la jied ïa u Paulus. Ha ka juh ka rukom ia u Deacon Baiming Pale u la shah pyrsad mynsiem da ka jingaiei jong U Blei bad ïa ki kyntien im sngi jong u, u la shim na ka jingthoh jong u Paulus Apostol sha ki Khristan ha Kalatia. “U la jied ïa nga da ka jingaiei jong u” (Gal 1:15).
U Bishop Ferdinand haka sneng ka kraw ïa u Baiming Pale u ong “Ko Dikon Baieid, ïa phi la jied napdeng jong ngi, ban pyni ïa ka jingisynei U Blei ha ngi. La pynrhem ïa phi da ka Jingkhuid U Mynsiem jong U Blei, ba phin long ka dur jong U khrist. La pynrhem da ka jingieid jong ka dohnud jong U Jisu hi, ba phin lah ban pynkoit ïa man ki dohnud jong ki briew baroh; da ka jingtip bad ithuh bha ïa la ki kynhun langbrot, phin lah ban sharai bha ïa la ki langbrot jong phi”.
Na pdeng kiba wan sakhi ïa kane ka jingpynkyntang Lyngdohniam don kiba nabar jylla ki bym sngewthuh ïa ka ktien Khasi ne Jaiñtia bad ban pynsngewthuh ia ki, u Bishop Ferdinand u ai khyndiat kyntien da ka ktien Phareng kaba ong kumne shaphang u Lyngdohniam bathymmai u ong “You have been chosen from our mist, to make present God’s mercy in our mist. Inflamed by the Holiness of the Divine Spirit, May you be the true image of Christ (the other Alter Christus). Drawing love from Jesus’ own Heart, may you heal every human heart. Having the knowledge and the smell of your sheep, may you be a true shepherd of your sheep”.
Nangta u Bishop Ferdinand u pynkynmaw ïa ki paidriewngeit ba kane ka snem 2025 ka dei ka snem Jubili kaba 2025 snem ka jingwan longbriew U Jisu Khrist, U khun jong U Blei, Uba long U Nongpynim sha kane ka pyrthei. Shuh shuh u ong ha ka jinglong briew la ker sawdong ïa ngi da ka jingtlot bad na kane ka daw to ngin pyrshang katba lah ban im ka jingim ka babha kaba ieid ia U Blei bad ïala ki para briew la kyntu u Bishop ïa ki para bangeit.
Khatduh eh haba kren shaphang ka sngi Ephiphani, ka jingpynpaw U Jisu ha ki laingut ki ‘riewstad na Ri Mihngi kiba wad ïa u Jisu, u Bishop Ferdinand u ong bun ki briew hateng hateng ki jah lynti, hynrei to phai sha U Khlur bad u Khlur un ïalam lynti ban shem ïa u Jisu. To ma ngi ruh da ka jingshai jong U Jisu Khrist to ngin wanrah jingshai ïa ki briew kiba don ha pdeng ka jingdum bad ki bym pat ithuh ïa u Jisu Khrist kum U Blei bad U Nongpynim jong ki pynkut u Bishop Ferdinand.
La pynkut ïa kane ka sngi, ha ka nohphai sngi la don ka jinglehburom ïa u Lyngdohsohblei thymmai (Baiming Pale) da ki jingshad tynrai bad ki jingruwai da ki Balang shnong bapher bapher jong ka Parish St. Joseph Mynsngat bad na kiwei pat ki shnong jong ki Parish jong ka Jylla niam Jowai.