Jowai, Nailar 21: Ka Khasi Student Union (KSU) Ummulong Unit hynnin ka sngi 20 tarik ka la ïoh ban pynkup burom ïa 9 nguh ki khynnah kiba pass shakhmat ïa ka SSLC bad HSSLC exam bad kumjuh ruh ïa iwei i ba pyndep ïa ka PHD ha ka Education Department bad kumjuh ïa iwei iba ïoh ïa ka nam lahduh ha ka 2nd Meghalaya Bodybuilding Championship,Uunder 5’4″ category.
Ka KSU dap da ka jingkmen haba ïoh ban pynkup burom ïa ki samla jong ka shnong ha Ummulong Dorbar Hall kiba wanrah ïa ka nam hapoh ka shnong ïa kaba la tip kum ka 1st Maitshaphrang Award 2022.
Ha shwa kane ka jingsam khusnam la don ka jingïalang kaba shipor ïa kaba la pynïaid da ka samla C.R. Sana, Education Secretary Jowai Circle bad kumjuh ruh la ïoh ka jingkren lamkhmat na u samla Ioannis Suchiang uba dei u President Jong ka Jowai Circle uba la kyntu ba ym dei ban klet ïa ka shnong lajong lada ki khun ka shnong ki poi sha khmat bad ruh la ïoh ka jingkren na ka samla DR. Toba Lamare iba pyndep ia ka Phd (Education), iba la ai ruh ka jingkyntu ïa ki samla ba ki dei ban ïai minot tat haduh ban da ïoh ïa ka thong.
U samla Leningrad Tariang uba dei General Secretary WJH Unit haba kren ha kane ka sngi u ai ka jingkyntu ba kino kino ki samla kiba pass ki dei ban ieit ïa ka jingpule bad ba kin ïabeh ïa ka thong bad ruh ban kynmaw ïa ka burom akor bad ba nym klet ïa ki kmie ki kpa kiba trei shitom miet bad sngi ban pyndap na ka bynta jong ki namar ba ka burom ka akor ka dei kaba tam.
Ha kane ka sngi la ïoh ruh ka jingpyni dohksah na u samla Luckyman Kynjing uba ïoh ïa ka nam lahduh ha ka 2nd Meghalaya Body Building Championship 2022 Under 5’4″. Kane ka long katkum ka kyroh khubor na u samla Morning star Pasi, Publicity Secretary Jowai Circle.
