Da ka jingpynkhuid shnong paidbah pynlong ka Dorbar Shnong Mawroh bad Pahamsyiem ha Ri Bhoi
![](https://mawphor.com/wp-content/uploads/2023/11/WhatsApp-Image-2023-11-04-at-4.50.48-PM-Copy.jpg)
Nongpoh, Naiwieng 04: Kum kawei na ka thong ban wan rah ïa ka khuid ka suba bad ruh ban hikai sha ki paidbah nongshong shnong halor ka jingkordor jong ka khuid ka suba, ki ar tylli ki Dorbar Shnong ha Nongpoh ba kynthup ïa ka Dorbar Shnong ka Shnong Mawroh bad ka Dorbar Shnong ka Shnong Pahamsyiem mynta ka sngi ki la pynlong da ka jingïapynkhuid shnong paidbah ha kitei ki ar tylli ki shnoing ba hap ha ka thaiñ Nongpoh ha Ri Bhoi District.
Haba pynlong ïa kane ka jingpynkhuid shnong la wan ban shim bynta naduh ki samla, ki longkmie bad ki longkpa kiba la pyndep ïa la ka jong ka jong ka kam ram ban pynkhuid ïa ki sawdong sawkun jong ka shnong ka thaw na ka bynta ban wan rah ïa kata ka khuid ka suba hapoh ka shnong ka thaw bad kaba dei ruh kawei na ka jingïamih paidbah ba la ju pynlong man la u snem ba kum ka shnong ka wan rah ïa ka khuid ka suba.
Shua ba ki Dorbar Shnong jong kine ki ar tylli ki Shnong kin ïa mih ban pynkhuid ïa la ka shnong ka thaw, u MLA ka Nongpoh Constiteuncy, u Bah Mayral Born Syiem ruh u la wan ban ïa don bynta na ka bynta ban ai mynsiem ïa kine ki paidbah kiba la mih paidbah ban pynkhuid shnong, ha ryngkat ka jingdon lang ki nongïalam Shnong naduh ki Rangbah Shnong, ki Secretary Shnong bad kiwei kiwei ki nongïalam Shnong.
Haba ai jingkren halor kane ka jingpynkhuid shnong, u Bah Mayral Born Syiem kum u MLA ka Nongpoh, u la ai ka jingïaroh ïa ki bor pynïaid shnong kiba la shim ïa kane ka bynta ban pynlong ïa kata ka jingpynkhuid shnong, kaba ym dei tang ban lehkhuid ha shnong ha thaw, hynrei ban ai jinghikai ruh ha ki jingmut jingpyrkhat jong ki nongshong shnong ba kin sgnewthuh ïa ka jingkordor jong ka lehkhuid leh suba ym tang ha la ïing la sem, hynrei ki dei ban lehkhuid naduh ïing shaduh shabar jong ka shnong ka thaw.
Kum u Nongmihkhmat paidbah, u la ai mynsiem ruh naduh ki nongïalam shnong bad ki paidbah nongshong shnong ba ki hap ban don ka jingïatrei lang na ka bynta ka bha ka mait bad ka khuid ka suba hapoh ka shnong ka thaw, namar donkam ban don ki kynja kyndon ba hap ban pyrkhing na ka bynta ban wan rah ïa ka khuid ka suba ha kaba bunsien lada ngi long laitlan ngim sngewthuh ïa ka kamram kaba ngi dei ban leh na ka bynta ka bha ka miat bad ka khuid ka suba hapoh ka shnong ka thaw, u la bynrap.