Da ka jingkyrpad ki nongshet ja sngi PM POSHAN phah jingthoh u MP Rajya Sabha sha ka Sorkar Pdeng

Jowai, ïaïong 01: U MP ka Rajya Sabha na ka jylla Meghalaya u Dr. W. R Kharlukhi ula phah da ka jingthoh ban kyrpad ïa u u Myntri ka Sorkar Pdeng uba khmih ïa ka tnat pule pule u Dharmendra Pradhan halor ka jingkyrpad ka Union of Cook cum Helpers PM POSHAN Meghalaya, Shillong, na ka bynta ban pynkiew ïa ka bainong kaba T. 900 spah shibnai ne ka honorarium sha ki Cook cum Helpers na ka bhah jong ka Sorkar Pdeng khamtam sha ka thaiñ Shatei Lammihngi ka Ri India, kaba la sah kut khlem pynkiew la palat arphew snem mynta.
Hadien jingkyrpad ka Union ïa u Dr. Kharlukhi ba un ïarap ban ïakren bad u Myntri halor ka jingthoh kaba ki nongïalam ka Union ki ladep ai ha u Secretary ka DESEL Ministry Education ha ka 24, kyllalyngkot, 2024 ha Shastri Bhavan New Delhi, ha kaba ula kular ruh ban rah sha ki bor kiba halor jong ka Sorkar Pdeng.
Ïa kane kajuh ka jingkyrpad la ai jingthoh ruh sha u Narendra Modi Myntri Rangbah duh ka Sorkar pdeng ka Ri India naduh u bnai April ’22 lyngba u Lat ka Jylla Meghalaya.
Nalor katei ka jingkyrpad ban pynkiew ïa ka honorarium, ka Union ka la buh ruh ïa ka Jingkyrpad ïa ka Sorkar pdeng bad ka Sorkar Jylla Meghalaya ban ai noh da ka LPG ban shet ja ha baroh ki kamra shetja ki skul. Lada ka Sorkar kan pyntreikam da ka LPG kan ïarap ban pynduna ïa ka jingpyndonkam ban shet da ki dieng bad ka wanrah ïa ka jingkoit jingkhlaiñ shuh shuh ïa ki nongshet ja kiba bun ki dei ki Kynthei ki Longkmie bad khamtam ïa ka koit ka khiah ki khynnah skul. Da kane ka LPG ka por ban shet kan dang pynduna shuh shuh.
Ka Union of Cook cum Helpers PM POSHAN Meghalaya ka kyrmen skhem ba lyngba kane ka jingshimkhia u Bah W. R Kharlukhi MP, u Narendra Modi Myntri Rangbahduh ka Ri India bad u Dharmendra Pradhan Myntri ba peit ïa ka tnat Education ka Sorkar pdeng ka Ri India, kin sngap bad pyntreikam ïa kane ka jingkyrpad ka Union kaba la dei palat ka por ba ka Sorkar India kan pynkiew ïa katei ka pisa ba ?900 bnai kaba la neh sah naduh 20 snem mynshwa na ka bhah jong ka. Ka dor ka pisa kam ïa dei shuh kum ha ki 20 snem mynshwa bad mynta.
Kum ban shu pynkynmaw ha ka jingïakhih ka All Jaiñtia MDM Workers Union, naduh u snem 2019, ka Sorkar Jylla ha ka jingtreiborbah u Conrad K Sangma u Myntri Rangbah bad ki officer ki nongtrei ka tnat PM POSHAN ka tnat Education ka Sorkar Jylla ki la dep pynkiew ïa ka pisa na ka bhah ka Sorkar Jylla ban aiburom sha ki nongshetja (Cook cum Helpers) PM POSHAN scheme na ka T. 100 shi bnai sha ka ?1100 shibnai na ka bynta shiphew bnai, kaba la treikam naduh u bnai April’ 2022.
Kumjuh naduh ba la shimti u Swapnil Tembe IAS ïa ka PM POSHAN, ka jingsiew ka la wan manla u bnai ha ki bank account jong ki Cook cum Helpers PM POSHAN ka Jylla, ym kum mynshwa ka jingsiew pisa kaba ?1000 tyngka ka wan tang lai sien ha ka shi snem bad siew ïa kaba sah ar bnai ha u snem ba thymmai.
Ka Union ka la ai jingthoh ruh sha u Bah Paul Lyngdoh Myntri ka Sorkar Meghalaya ba un ïarap ban ïoh ïa kynduh bad u Dharmendra Pradhan, Minister ka Sorkar pdeng na ka bynta ban ïa kren halor ki mat jingkyrpad ka Union.
Ka Union of Cook cum Helpers PM POSHAN Meghalaya, Shillong ha ryngkat ka jingïatreilang bad ka All Garo Cook cum Helpers PM POSHAN, ki la ïa kynduh ha ka 29/03/25 bad ki hajar ngut ki Cook na baroh ka ri lum Garo ha Resulbelpara North Garo District.