Da ka jingkieng ïit ba 51.7 klur yn shna noh ha Mawkdok – Dympep, pynbna u CM ha Mawkdok

Shillong, Jylliew 23 : Ka Jingkieng iit ne ka skywalk kaban tei ha Mawkdok – Dympep, East Khasi Hills kan dei ka lynti ïaid kai kaba nyngkong eh ha ka jylla kaban tei itynnad bha ha ka jingmang pisa kaba kot haduh palat 51.7 klur tyngka.
Haba kren ha ka jingïalang jong ka CM Connect kaba long ha madan phutbol Mawkdok, Khatar Shnong – Laitkroh Block, u Myntri Rangbah ka Jylla u la pyntip ba ynda la dep kane ka projek, kan sa kylla long kawei na ki jaka jngohkai pyrthei kaba baroh kin sa kwah lut ban wan iuhkjat bad peitkai.
“Kane ka dei ka projek ba 51.7 klur tyngka bad kan dei ruh ka jingkieng ïaid kai (skywalk) kaba nyngkong eh ha ka jylla ba ki paidbah kin ïoh ban peitkai ïa ka jingitynnad ki sawdong sawkun kiba don ha Mawkdok-Dympep. Baroh shi katta ki paidbah ki hap ban shu peitkai na rud surok hynrei ynda la dep kane kin sa ïoh ban ïaidkai bad peitkai ïa ka jingithiang kane ki jaka ha kane ka thaiñ,” u la ong.
U Myntri Rangbah u ong ruh ba nalor kane ka skywalk kin don ruh ki jaka bam, ki dukan kiban pynïaid hi da ki trai shnong nalor kiwei kiwei ki jingdonkam kiba ïadei na ka bynta ki paidbah nongwan kai nalor ka jaka ieng kali kaba biang.
La pyntip ruh ba ïa ka jingkhot tender la pyndep bad ïa ka kam ruh la dep ban aiti na ka bynta ban pyntrei noh. “Ngi khmih lynti ba ka jingpyntrei ïa kane ka kam kan sdang noh hynrei ba dang dei ka aiom slap kumta ngi khmih lynti ba hadien shibnai ar bnai yn sa lah ban sdang noh ïa ka kam,” u la ong.
Katkum ka jingïathuh jong u, kane ka jingkieng kan jrong kumba 40 mitar bad ïar pat kumba 7 mitar bad kan sa kylla long ruh ka jaka ïaid kai kaba jrong tam ha baroh kawei ka ri.
U Myntri Rangbah u ong ba kane kan dei kawei ka projek kaban kyntiew ïa ka kam jngohkai pyrthei ha ka jylla bad khamtam eh na ka bynta ka ïoh ka kot jong ki paidbah katei ka thaiñ hi baroh kawei.