Da ka jingïoh jaka 22 acre yn sa lah wanrah ki liengsuiñ ba heh ha Shillong Airport, ong ka AAI

Shillong, Nailur 05: Ka Airports Authority of India (AAI) ka la ong ba ki la don khyndiat ki jingpynkylla bad ka jingïoh jaka sa kumba 22 acre, bad da kane ka Shillong Airport kan sa lah ban buh ïa ki liengsuiñ kiba heh ha kane ka kad liengsuiñ.
Kane ka jingïakren ka AAI kaba 3 tarik u Nailur, la wanrah hakhmat ka Meghalaya High Court ha ka por ba shim bishar ïa ka PIL ha ka sngi Palei.
Ka la don ka jingïathuh kaba lyngkot halor ka jinglah ban pynïar bad pynheh ïa ka airport na ka bynta ban buh ïa ki liengsuiñ kiba heh.
“Ka long kaba dei ban kdew ba ka Airports Authority of India katkum ka LiDAR survey report haba khmih ha kiba bun ki liang ka la shem ba da ka jingpynkylla bad ka jingïoh shuh ka jaka kaba 22 acre, na ka liang ka airport kan sa long kaba lah ban buh ïa kine ki liengsuiñ kiba heh bad kane la kdew ha ka jingïakren bad ka jingmynjur la dep ban ai da ka M/s Spice Jet ban pyntreikam ïa ki B737 aircraft,” ong ka ïingbishar ha ka hukum.
Dr N Mozika, DSGI la kyrpad ban shah ban wanrah ïa ka kaiphod jong ka LiDAR survey report kaba bniah halor kane. U AG u ba la mihkhmat na ka liang ka sorkar la ong ba ki la ïohdiang ïa kane ka jingïakren pynbeit bad shisien ba ïa ka kaiphod la wanrah, ïa ki kam na ka bynta ka jingpyntreikam ynsa lehnoh bad ban aiti hakhmat ka ïingbishar.
Halor kane, ka ïingbishar ka la bthah ba ïa ka kaiphod dei ban wanrah hapoh ka 10 sngi bad ka jingshim bishar biang halor kane la buh ba kan long ha ka 16 tarik mynta u bnai.